Mito de cazata ritual

Os mitos de cazata ritual son mitos en los que s'explica la fundación d'una ciudat u un estato dimpués que bell antipasau u bell heroi, u una colla d'hombres representativa d'un grupo etnico, engalzase a un animal salvache dica un terreno desconoixito a on deciden de quedar-sen dimpués de poder-lo matar u no.

La inspiración d'estas leyendas ye a vegatas un pareixito entre o nombre d'a fundación y un animal. Por eixemplo Nachera, tienga a etimolochía que tienga, se pareixe a l'arabe nasra que significa alica, y ye fácil que esto haiga inspirato lo mito fundacional de lo Monesterio de Sant Benedet, en un puesto ta lo que plegó lo rei García enta 1040 seguindo a un falcón.

Os polacos tienen tamién un mito fundacional relacionato con l'alica, inspirato por o pareixito que bi ha entre como se diz alica en polaco y la fortaleza de Gniezno, que provién d'una palabra eslava Cnez derivata de lo latín CAESAR. Seguntes este mito los polacos troboron lur tierra seguindo a una alica blanca.

Estos mitos son muito estendillatos por Eurasia. Lo historiador rumán d'as relichions, Mircea Eliade, lis dedica un capítol en lo suyo libro De Zalmolxis ta Chenguis-Khan, analizando-ie lo mito de fundación de Moldavia dimpués que lo voivoda Dragox cazase un bisont u un uro, mito que coincide en parte con la leyenda de lo Toro y la Estrela de fundación de Teruel.

No ye la sola representación d'esta clase de mitos en la mitolochía aragonesa. La leyenda d'a fundación d'o Monesterio de Sant Chuan d'a Penya ye tamién un caso de cazata ritual, en este caso lo heroe ye un noble que encorreba a un ciervo. En esto coincide con o mito fundacional d'os hunnos y hongaros, que encorreban tamién a un ciervo y asinas conoixioron lo que i heba a l'ueste de la zona paulenca de Meotia, que los deseparaba de los países que invadirían dimpuesas.