Pozo de Sant Lazaro

Puent de Piedra

Balcón de Sant Lázaro

O pozo de Sant Lazaro ye una simera que se troba en o río Ebro entre as dos arcatas mas septentrionals d'o "puent de Piedra" de Zaragoza. Como una dolina, s'ha formato por karstificación d'os chesos que bi ha debaixo d'os aluvions de l'Ebro. A creyencia popular diz que no tien fundo y que se traga tot o que i caye. Atros dicen que plega dica Tortosa y que a suya salita ye a mar.

O suyo nombre lo prene d'o convento de Sant Lazaro, establito en 1224 por a orden de Nuestra Sinyora de La Mercé, que se trobaba chunto a l'Ebro a man d'o puent de Piedra, en o Rabal.

O pozo ye o puesto que ha esleito muita chent ta rematar con a suya vida, esistindo tamién una leyenda que nos recenta como dos enamoratos, habendo-se oposato los suyos pais a lo suyo matrimonio, se ligoron o cuello l'un a l'atro con un cachirulo y se capuzoron chuntos en o pozo. Os suyos calavres nunca no se troboron.

En aviento de l'anyo 1971 un autobus cayó a l'Ebro en ixe punto. L'autobus desapareixió baixo as auguas con nueu personas que no se troboron. Dica 10 anyos dimpués no lo quitoron de l'Ebro os bombers de Zaragoza.

Vinclos externos

• Imachen de l'autobus en o pozo de Sant Lazaro
• (es) Zaragoza, el Ebro
• (es) Leyendas del Ebro
• (es) Los restos arqueológicos del antiguo Convento de San Lázaro se integrarán en el proyecto de la ribera del Ebro. El Periodico de Aragón 12/06/2007.