Gaels

Mapa de las Islas Britanicas con la distribución hipotetica de los gaels (color verde), britans (roya) y pictos (azul) en tiempos de las invasions anglo-saxonas.

Los gaels son un pueblo habitador d'Irlanda en la Edat Antiga y Alta Edat Meya que prenió lo control de tota la isla a costa d'atros pueblos celtas que bi heba en l'este (galos, belgas, britans) a los qui rematarían asimilando. Tamién tenioron una expansión por las costas orientals de la Mar d'Irlanda y las suyas islas en tiempos de la Caita de lo Imperio Román, por lo que los gaels tienen en los irlandeses, maneses y escoceses de las Highlands y las islas actuals los suyos continadors dreitos.

Tamién se fa servir la denominación de "gael" pa dicir a los parlants de luengas gaelicas (irlandés, manés y escocés). Entre los irlandeses y escoceses que no charran gaelico bi ha muita chent que se consideran gaels por lur ascendencia historica y por lur herencio cultural.

Etnonimo

En gaelico antigo s'escribiba goídel. En gaelico irlandés s'escribe gael y en gaelico escocés gàidheal. Los romans lis diciban scoti en lo sieglo IV, y ye como lis dicen en "Historias contra los paganos" de Pavlo Orosio:

Aquesta isla esta mas cercana de Bretanya e es mas estrecha por espacio de tierra, mas es mas provechosa por la tempranza del sol e del cielo, e es habitada por las gentes de los escotos.

E alli muit cercana encara esta la isla clamada Mevania, la cual es de espacio non chica, e es provechosa e temprada tierra, e semblantment es habitada por las gentes de los escotos.

Manimenos lo termin que remató aplicando-se a los gaels que s'establioron en lo norte de la Isla de Bretanya, que prenió lo nombre d'Escocia. Los historiadors aplican especialment lo termin de "escotz" tamién a los gaels que practicaban feban incursions de saqueyo y piratería en Britania. .