Pedagochía

Pintando con tiza en una pizarra.

A Pedagochía ye l'arte u a sciencia de l'amostranza, u d'a educación.

Etimolochía d'o termin

Pedagochía viene d'o griego, paidagogos (παιδαγωγία), que yera l'esclavo que acompanyaba os ninos enta la escuela. A parola paida u paidos se refiere a os ninos, este ye lo motivo por o qualo bell uns destinguen d'entre "Pedagochía" (amostrar a os ninos) y Andragochía (amostrar a os adultos). A parola latina ta referir-se a la Pedagochía, educación, ye muito más emplegata y, asobén, as dos s'emplegan de forma indestinta.

Historia d'a Pedagochía

A Pedagochía existe dende que la educación pasó a estar considerata una qüestión social y no sólo que familiar. Por esto os primeros escritos teoricos apareixen en Grecia, en as polis democraticas on que l'amostranza facilitaba l'acceso a la politica. Roma heredó esta preoucupación.

En a Edat Meya, a educación yera muito ligata con a Ilesia, perque a sola educación que se consideraba de proveito yera la relichiosa que permetiba adubir a salvación. Antimás, a cultura yera en os monesterios y dimpués en as universidatz, en ixas envueltas dominatas por os teologos. O Renaiximiento, con o suyo afán de recuperación d'os clasicos y l'ansia de saber y de tener cultura, dio un nuevo empentón a la Pedagochía. Con a Ilustración se ligó pa cutio con a ideya de progreso, dato que sin d'educación un pueblo no puet adebantar (por ixo se fayón as campanyas d'alfabetización).

A Pedagochía en l'actualidat

Actualment, a Pedagochía ha evolucionato muito dende la suya orichen etimolochico. Enguán, a Pedagochía no ye a sciencia que s'ocupa d'as tecnicas de l'amostranza, esto ye fayena d'una altra sciencia pedagochica denominata Didactica. A Pedagochía ye un conchunto de sabers que s'ocupan d'a educación como un fenomén tipicament social y especificament humano. Ye, por ixo mesmo, una sciencia de caracter psicosocial que tien por obchecto lo estudio d'a educación con a fin de conoixer-la y perfeccionar-la. Tamién ye una sciencia de caracter normativo porque no se dedica a describir o fenomén educacional so que a estableixer as pautas u normas que s'han de seguir ta levar a buen termin ixe fenomén.

Pedagochía tamién se refiere a lo correcto uso d'estratechias d'amostranza (se veiga teoría instruccional). Por eixemplo, o brasilenyo Paulo Freire, un d'os educadors más significativos d'o sieglo XX, se refiere a lo suyo metodo d'amostranza t'adultos como "pedagochía cretica".

A Escuela Catalana de Pedagochía tenió o suyo maximo en os anyos 30 d'o sieglo XX, en os tiempos d'a Republica.

Pedagogos famosos

• Paulo Freire.
• Erasmo de Rotterdam.
• Célestin Freinet.
• Comenius.
• Joan Bardina i Castarà.
• Maria Montessori.
• Jean Piaget.
• John Dewey.
• Rosa Sensat.
• Francesc Ferrer i Guàrdia.
• Adolphe Ferrière.
• Victorino de Feltre.
• Pierre Bovet.
• Giuseppe Lombardo-Radice.
• Alexander Neill.
• John Haden Badley.
• Johann Bernhard Basedow.
• Johann Friedrich Herbart.
• Joan Puig i Elias.
• Cecil Reddie.
• Pere Roselló i Blanch.
• Ramon Ruiz Amado.
• Edward Lee Thorndike.
• Carleton Wolsey Washburne.
• Juan Pablo Bonet.
• Roger Cousinet.
• Jean-Joseph Jacotot.
• Nadezda Konstantinovna Krupskaja.
• Joseph Lancaster.
• Georg Kerschensteiner.
• Lourenço Filho.
• Lorenzo Luzuriaga Medina.
• Anton Makarenko.
• Andrés Manjón.
• Paul Oestreich.
• Helen Parkhurst.
• Peter Petersen.
• Wolfgang Ratke.
• Eduard Spranger.
• Francesco Tonucci.
• Stanisław Konarski.