Rusins

Os rusins u rutens son un pueblo eslavo oriental y de relichión greco-catolica, que vive en a zona d'os monts Carpatos, sobre tot en a versant sud.

Historia

A lo principio yeran comunidatz rurals d'as vals d'os Carpatos eguals que los atros ucraineses occidentals y sin reivindicacions nacionals que se conoixcan. De feito en l'aria entre Polonia, Rumanía y Ucraína bi ha comunidatz como hutsuls, boicos y lemcos con identidat propia, dentro u fuera d'a versant sud. A fins d'o sieglo XVIII se repartioron Polonia entre o Imperio Austro-Hongaro, o Imperio Ruso y Reino de Prusia y pasoron a depender d'os primers. A partir de 1848, la partita hongara d'ixe imperio administró las tierras d'ixas comunidatz a lo sud de los Carpatos.

Las autoridatz hongaras s'intresoron en que os eslavos orientals desembolicasen una conciencia nacional diferent de los eslavos orientals d'o norte d'os Carpatos (Galitzia austriaca) administratas por a partita austriaca d'o imperio. Manimenos, dica 1918 no tenioron exito porque no i habió una clase intelectual rutena receptiva d'ixas ideyas y de trasmeter-las a la chent.

En 1918 los gobiernos de los nuevos estatos que amaneixioron dimpués la I Guerra Mundial, Hongría y Checoslovaquia, preboron d'acomboyar a la población rutena. En Checoslovaquia se creyó la rechión dita Podkarpatská Rus u Rutenia Sozcarpatica, y li dioron plena autonomía en 1938. Ixa rechión la ocupó o Exercito Royo y pasó a la URSS dimpués la Segunda Guerra Mundial.

En lo referendun de l'1 d'aviento de 1991, que lebó a la independencia de la republica d'Ucraína, o 78% de los rusins votoron a favor de l'autonomía dentro d'Ucraína, feito que refusó o gobierno de Kiev.

A mitat d'o sieglo XIX, bells agricultors rutens emigroron dende os Carpatos t'o sud d'a partita hongara d'o imperio, especialment ta Voivodina, formando-ie parte d'o suyo melting pot, y s'han mantenito como grupo etnico diferent d'os atros eslavos que bi ha, incluitos los atros ucraineses. Tamién bi n'ha chicotas comunidatz rutenas en o norte de Bosnia y l'este de Croacia, encara que la de Vukovar la acotoloron os serbios quan prenioron a ciudat en una limpieza etnica por haber-se aliato con os crovates.

Parla

En os Carpatos, os rutens no tienen una luenga escrita unificata. En Checoslovaquia d'o periodo d'entreguerras preboron de creyar una prensa y un sistema educativo rutens, pero teneban la intención d'emplegar lo ruso como medio de comunicación escrito, cosa que se desvinió dimpués de la Segunda Guerra Mundial por a ocupación sovietica.

Manimenos en Voivodina s'ha desembolicato una luenga estandard pa la variant ucrainana que se i charra (rutén panonico), con prensa y radio, y mesmo un departamento de rutén en la Universidat de Novi Sad.

Bibliografía

• Felipe Fernández-Armesto. "LOS HIJOS DE ZEUS. PUEBLOS, ETNIAS Y CULTURAS DE EUROPA". 1996 Grijalbo.