Río Guadalop

O río Guadalop (Guadalope en castellán) ye un afluent de l'Ebro por a marguin dreita. Naixe en Villarroya de los Pinars amán d'o Puerto de Sollavientos, a 2.500 metros d'altaria sobre o ran d'a mar, y desemboca en l'Ebro en a ciudat de Casp luego d'un recorrito d'una longaria de 160 km con un cabal meyo de 265 m³/s y una superficie d'a suya cuenca hidrografica de 3.890 km². As auguas d'o río Guadalop y os afluents suyos alimentan una important agricultura de regano, con especial dedicación a o presco de Calanda. Pa regular l'augua existen diferents entibos.

Tien como afluents o río Alcherez, o río Guadalopiello y o río Mezquín.

Hidronimia

Puent meyeval sobre o río Guadalop en Mirabet de la Sierra.

A cuenca hidrografica d'o río Guadalop.

L'escritor musulmán Yakut, d'os sieglos XII y XIII menciona un termin agricola (nahiya) de l'aria de Zaragoza como Wadi al Lawh. Puet interpretar-se como río d'os lupos u d'as tablas. Tamién s'ha interpretato lo nombre a partir de l'antroponimo Lop, d'orichen romanico. Tamién i ha puesto influir la celebridat d'o Rei Lop en a formación d'o nombre, por analochía, (a zona d'este río la yeran ocupando os cristians en a suya epoca).

Os musulmans andaluces no clamaban egual a os ríos en tot o suyo recorrido, sino por tramos dependendo d'os lugars por on pasaba. Por d'encima de Calanda se clamaba río de Cutanda u Cotenda, porque Cutanda yera o nombre d'o distrito (iqlim) de l'aria de Mas de las Matas.

S'escribe sin vocal final ya en 1181:

Los fornos e las justicias que sian al foro de Zaragoza e de los morahales de Guadalof enaca que ajan los senores a medjtate

Encara s'escribiba sin -e final en 1658, quan dimpués d'una riada u creixita de lo río en facioron un informe tetulato Acto público de relaçión berdadera de la crezida o habenida del río Guadalop .

Se veiga tamién

• Se veigan as imáchens de Commons sobre o río Guadalop.