Moda

Ta atros usos d'iste termin se veiga Moda (desambigación)

Modelos en una pasarela de moda

A moda (d'o francés, mode y iste d'o latín modus, manera u mesura) indica en o suyo significato más amplo una esleción u, millor dito, un mecanismo regulador d'eslecions, realizatas en función de bells criterios de gusto. A moda ye l' "uso, manera u costumbre que ye en alza mientres un periodo de tiempo, u en un determinato país, especialment en os vestitos, telas y adornos, más que más os recientment introdueitos". Seguntes o marketing a moda ye un fenomén eterno y siempre nuevo, universal y concreto, que tien as suyas radices en a imitación. Moda ye l'actual, u o que ye en vigor y intresa a una mayoría en un inte determinato. Manimenos, en ocasions, aplicata a lo disenyo y especialment a la indumentaria ye aquell vestito, estilo, pieza, color u complemento, que ye lebato por parti d'o grupo socialment más important u hechemonico u exclusivo, que ye capaz d'influir en os atros.

A moda exprisa o esprito d'o tiempos y ye un d'os indicios más inmediatos d'os cambios socials, politicos, economicos y culturals. Con a plegata d'o sieglo XX, a traviés d'a popularidat d'o cine y a televisión as estrelas d'a pantalla se convirtioron en idolos internacionals y prencipioron a imposar a moda. O mesmo pasó con os musicos famosos, que prencipioron a meter de moda estilos radicals que a choventut no tardó en imitar. Hue en día, a situación no ha cambiato guaire. Os anunciants emplegan eficazment os desfiles de modelos, revistas, cartels, aparadors y anuncios televisivos ta creyar una demanda de piezas nuevas.