Serpentes

Serpentes
Thamnophis sirtalis
Clasificación scientifica
Reino: Animalia Filo: Chordata Subfilo: Vertebrata Clase: Reptilia Orden: Squamata Suborden: Serpentes
Serpients en o mundo

As serpients u ofidios, scientificament Serpentes (antes Ophidia), son un suborden d'a clase reptils y de l'orden d'os escatosos (Squamata) caracterizato por una sola fila d'escatas ventrals y una locomoción sin patas (encara que no son os solos), con ondulacions d'o cuerpo pareixitas a la traza de nadar d'os peixes.

Aparato dichestivo

Una Boa constrictor imperator minchando

Una d'as cosas més determinants en a evolución d'os ofidios ye l'adaptación a lo consumo de grans presas, que se tragan enteras.

Boca

O esqueleto cranial presenta unas hemimandibulas inferiors no unitas entre ellas que por un ligamento de teixito conchuntivo elastico, con o que se pueden deseparar amplament l'auna de l'atra. Tamién bi ha en estas hemimandibulas unas articulacions intermeyas que permiten cierta mobilidat a lo dentario. Falta l'arco zigomatico superior. Os fenomenos d'estreptostilia y cinesi se troban por un regular més desembolicatos en os ofidios que en garra reptil. Quasi totz os uesos d'o cranio, de fueras d'os d'a caixa cranial son mobils en mayor o menor mesura.

Os dients son curvatos enta dezaga y agutas, se troban sobre a mandibula y os uesos d'o paladar pero no en o premaxilar, impiden que as presas resbalen mientres a deglución. Os dients son pleurodontos, cayedizos que se renuevan a sobén. Bi ha quatro tipos de dentición seguntes a posición y estructura d'os dients (aglifa, opistoglifa, proteroglifa y solenoglifa); os tres zaguers con dients modificatos que inchectan vereno. Bellas especies, como a cobra d'a especie Naja nigricollis, presentan os dients modificatos ta escupir el vereno a más de quatro metros.

O esofago ye gran y distensible, as presas i permaneixen muito tiempo mientres una lenta dichestión estomacal encomienza en o cabo anterior. Os minchars s'espacian muito, a vegatas semanas, y dica meses.

Aparato locomotor

Serpient (Crotalus scutulatus) esbolligando-se por o disierto

L'ausencia d'extremidatz ye total por o que fa a lo par anterior, pero puet haber-ie vestichios d'a cintura pelviana bell elemento d'extremidat (unglas a los dos costatos d'a cloaca) en bella especie. Pa ondular-se o cuerpo en a locomoción se diferencia una musculatura d'a paret d'o cuerpo que se refirma en costiellas mobils y fuertes. A columna vertebral se fa muito flexible y luenga, con 200-400 vertebras que tienen superficies adicionals d'articulación por d'encima d'as normals, entre unos procesos en as caras anteriors (zigantros) y atros en as caras posteriors (zigosfenos). Pa poder agarrar-sen millor a lo suelo as escatas d'a superficie ventral s'ordena, ixamplatas, en una sola fila. Bellas serpients son capaces de mover-sen con estas escatas transversals y una musculatura especial, mesmo con o cuerpo extendito en linia recta, sin ondulacions laterals, con a traza d'as erucas. Os movimientos d'as serpients son a més a saber-lo d'efectivos en l'augua y "brancamen" d'os arbols, y belunas son escarvadoras. Ciertos escurzons y serpients de cascabel tienen una traza de meter-sen en l'arena enfilando o cuerpo d'alto u baixo perpendicular a lo sentito d'a marcha.

Organos d'os sentitos

En royo os receptors d'infrarroyos, en negro orificios nasals.

Os parpiellos s'han soldato y son trasparents, y son como unas gafas. No tienen membrana nictitant ni aniellos d'esclerotica. Os musclos oculars son simplificatos, a imachen s'enfoca por desplazamientos de debant enta dezaga d'o cristalín. As serpients diurnas no tienen conos normals, tienen conos dobles que pareixen deribatos d'os bastons.

No tienen forato auditivo externo, ni timpano, ni cambra timpanica, ni trompas d'Eustaquio. A columela ye refirmata en o quadrato (a traviés d'o que a mandibula pareix que reculle as vibracions d'o suelo). L'organo de Jacobson se troba muito desembolicato, y en a suya función colabora con a luenga, mobil y con forma de forca, retraible en o interior d'una porción basal gruesa como una funda.

Bi ha fosetas sensorials que detectan radiacions caloricas y infrarroyas en posición labial (Boidos) u debant d'os uellos (Viperidos) como as serpients de cascabel y otros Crotalinae, y permiten detectar mamifers y aus en a escuridat.

Evolución

Fósil d'Archaeophis

Pareix que as serpients provienen d'un grupo d'engardaixos excarvadors, d'habitos sotorranyos que secundariament tornoron a la superficie. Esto explicaría a manca de patas y d'oido meyo y externo, y a estructura d'os uellos, reconstruitos en una evolución a partir d'organos vestichials d'alcuerdo con un patrón diferent d'os atros reptils. Atros autors han proposato orichens a partir de formas nadadoras (bi ha serpients nadadoras).

Os varanos (Varanidae) actuals pareixen estar o grupo de saurios més a man d'os ofidios: se pareixen en a forma d'a luenga, en l'articulación intramandibular y en l'arquitectura cranial. A més una familia extincta d'a superfamilia Varanoidea, os Mosasauridae, yeran aquaticos u marins.

O rechistro fósil d'os ofidios encomienza en o cretacico superior, con formas pareixitas a las boas actuals.

As serpients actuals, con 3000 especies son un grupo con gran exito evolutivo. Con 11-12 familias, a clasificación d'os ofidios se fa en tenendo en cuenta rasgos como a retención u no de restos d'a cintura pelvica y extremidatz posteriors, a forma d'o cranio, y d'a suspensión mandibular, a dentición, a presencia de verenos y tamién a forma y disposición d'os dients inoculadores y os tipos d'escatas.

Bibliografía

• Adolfo Aguilar, Eduardo de Juana y Arturo Morales. Historia Natural, tomo 6 Zoología - Vertebrados. Carroggio, 1989.
• Mehrtens, J. Living Snakes of the World in Color. Nueva York: Sterling, 1987, ISBN 0-8069-6461-8.
• Freiberg, M., The World of Venomous Animals. Nueva Jersey: TFH Publications, 1984, ISBN 0-87666-567-9.
• Mundkur, Balaji, The Cult of the Serpent. SUNY Press, 1983, ISBN 0-87395-631-1.

Vinclos externos

• Se veigan as imáchens de Commons sobre Serpentes.
• Wikispecies tiene un articlo sobre Serpentes.
• (en) Imachens de serpentes.