Aragonés grausino

O grausino ye l'aragonés ribagorzano que se charra en Graus (Uesca). Ye una de as bariedaz de o baxorribagorzano millor conoxitas.

Fonetica

Tot y que predomina a diftongazión de as E y O curtas latinas, como ye normal en aragonés, bi ha casos de no diftongazión, como en atras localidaz de a Baxa Ribagorza ozidental:

• ben, pedra, den, peu
• coba, bou

Como ye normal en baxorribagorzano os diftongos -ie- de o sufixo -iello s'han simplificato en -illo:

• ixartillo, armilla, pero sindembargo se conserba maziello.

Beyemos -o final pero ye fazil que siga recompuesta, porque se troba en casos que l'aragonés cheneral no en tiene.

• abiento, aiguazo, espantallo, año
• mano

Sin dembargo se pierde en bels casos dezaga -ll-, seguindo una tendenzia común con o catalán que no se troba guaire en aragonés:

• batall, corcoll

Encara que a F- inizial se conserba, bi ha muitos castellanismos foneticos:

• abllá, iel, hígado, hornillos

Encara que a Ch- inizial se conserba, bi ha muitos castellanismos foneticos:

• juebes, jodías, jarra

Bi ha poquez exemplos de conserbazión de as oclusibas xordas interbocalicas latinas:

• crepa, batallá, batall, mallata, trucadó

A -x- se conserba bien, y como ye normal en ribagorzano ye acompañata d'una i:

• un coixo baixaba por una baixada con un faixo de buixos

A x inizial ye acompañata d'una i-, como en belsetán y chistabín:

• ixambre, ixada, ixolomá, ixafegá

A -ll- que bién de os grupos -LY-, -C'L-, -G'L-, etz...se conserba en muitos casos, pero tamién trobamos asobén castellanismos foneticos:

• bieja, cogé, consejo, muertijuelo, zejas

A -it- que probién de os grupos latins -CT-, -ULT- se conserba mal, y abundan os castellanismos foneticos:

• mucho, cochilla, escuchá
• ocho, leche, noches, fecho, encara que bi ha bel testimonio de fei (forma baxorribagorzana de feito).

Como bi ha doblez de formas chenuinas y castellanizatas, bi ha casos de rearagonesizazión incorreuta, (dende o punto de bista de os que no reconoxen l'aragonés, hiperdialectalismo):

• dixá/dejá, treballá/trabajá
• muixar en cuenta de mullar

Morfolochía

L'articlo en os zaguers años coinzide con o castellán, pero ye domentato l'emplego antigo de lo, es, y a. Puede contrayer-se con a preposizión por: pol camino, pola pllaza.

L'emplego de tot se reduze a cuan ba dezaga de l'infinitibo, en os atros casos se diz to, y 'to puede emplegarse pa toz os cheneros y numeros:

• te lo boi a 'spllicá tot
• to la semana, to las cosas.

O pronome presonal ellos de l'aragonés cheneral ye en grausino els, ye analochico de él.

Bi ha berbos que en grausino y en catalán son de a conchugazión en -ir y en castellán en -er:

• cosí, atrebí, chenerals en aragonés.
• tení, querí que contrastan con l'aragonés cheneral tener, querer.

Bi ha muitos infinitibos de a conchugazión en -ar transformatos en -iar:

• obriá, mezcliá, femiá, propulsiá

Bi ha manca de diftongazión en as formas rizotonicas de bels berbos, por analochía, feito común en baxorribagorzano:

• Tos rogo, Mos recorda.

L'achiquidor -et a begatas pierde a -t final:

• barranquet, balsonet
• coralé, brazolé, banqué

Lesico

O lesico catalán representa dica un 4 %:

• asquena, patamoll, filosa, sillón

Esisten palabras tipicas de Graus y resolada:

• mirondiá, rafollada, susoído, torán

Pero cada begata son más comuns os castellanismos, tanto os foneticos (que ya en emos charrato), como os lesicos.