Fernando Romanos Hernando

Fernando Romanos Hernando (Zaragoza, 1963) ye un investigador d'as variedatz vivas de l'aragonés y escritor. Ye diplomato en Troballo Social y Relacions Laborals y Profesor de IES en Utevo (Zaragoza).

Ye vinclau dende fa muitos anyos a la Val de Chistau (Casa Tornel de Chistén) y participa activament en a vida social de Sobrarbe. Ha adedicau arrienda anyos a investigar y conoixer a luenga aragonesa charrada en ixos lugars y a amostrar l'aragonés en entidatz como a Universidad Popular de Zaragoza.

Ye miembro d'o Consello d'a Fabla Aragonesa, d'o Consello Asesor de l'Aragonés y estió fundador de o Ligallo de Fablans de l'Aragonés. Ye responsable de socialización de l'Academia de l'Aragonés.

Ha dirichiu os programas europeu FEDER-Interreg Dezaga d'es Perineus: replegar una cultura d'a parola de formación en materia de luengas minoritarias entre l'aragonés y o gascón y POCTEFA-Interreg Culturas Pirenaicas y Nuevas Tecnologías ta creyar una fonoteca transfronteriza en espacio virtual con gravacions d'aragonés y de gascón y a edición de un diccionario quatrilingüe aragonés, gascón, francés, espanyol.

Obras

Ensayo

Fernando Romanos ye autor (solo u con atros autors) de qualques obras d'investigación sobre dialectolochía aragonesa:

• Al límite: la pervivencia del aragonés en las comarcas del norte de Zaragoza.
• L'aragonés de A Fueba: bocabulario y notas gramaticals (chunto con Fernando Sánchez)
• Fraseología del Chistabín (chunto con Fernando Blas)
• El aragonés de Baixo Peñas (chunto con Fernando Blas)
• Diccionario Aragonés: Chistabín-Castellano (chunto con Fernando Blas). Este treballo, publicau en 2008, obtenió en 1999 una mención especial en o premio Marqués de Lozoya d'o Menisterio de Cultura.
• Más d'antes en Sarabillo. Bida y Parlaje (chunto a Joaquina Guillén). Rolde de Estudios Aragoneses (2010). Se tracta d'un libro sobre a vida cutiana tradicional a partir d'os testimonios de Joaquina Guillén vecina de Saraviello, coordinaus por Fernando Romanos, qui n'i fa tamién l'analís lingüistica.

Tamién ye autor de qualques articlos en revistas, como Modismos y expresiones con el verbo Fer en Chistabín, El aragonés residual de Tardienta, Aragonés ribagorzano: lesico emplegau en a obra de Pablo Recio, u O parlache de Tella: aragonés del Alto Sobrarbe.

Literatura

En o plano literario, ha ganau bell premio por narracions curtas como "Barucas pegallosas", "Es bulturnos", "Farto", "Baixo l'augua" u "O lupo saputo". Va conseguir o premio Arnal Cavero en 2005 con o libro de poemas "Baixo a mirada de Os Fustez" y o Premio "Ziudá de Balbastro" en 2010 con a novela "Alas de Papel. Gernika, 1937." En 2011 ganó a XIV edición d'o Concurso de coplas aragonesas en aragonés organizau por o Concello municipal de Zaragoza, con a colección titulada Versos ta ella

Creyación audiovisual

Ye autor d'obras audiovisuals como "Patrimonio Lingüistico en Alta Zaragoza" y "Patrimonio Lingüistico en Agüero" producidas y dirichidas por Eugenio Monesma, y "Patrimonio Lingüistico en a Bal de Tena", "O dia d'o traje d'Ansó", "La falleta y el diya d'a cultura chistabina", "De Fago a Erisué: archivo audiovisual del aragonés", "l'aragonés de Fonz", "patrimonio lingüistico en Ribagorza" (estes cinco zaguers chunto con Fernando Blas). Fernando Romanos y Fernando Blas dirichen l'Archivo Audiovisual de l'Aragonés, un amplo prochecto de replega en vidio dichital d'as variedatz vivas de l'aragonés por meyo de testimonios de presonas vivas que parlan l'aragonés.

Referencias

Premio Arnal Cavero 2005