Sistema vocalico d'o latín vulgar

Letra		Pronunciación
		Latín clasico	Latín vulgar
ă	A curta	[a]	[a]
ā	A luenga	[aː]	[a]
ĕ	E curta	[ɛ]	[ɛ]
ē	E luenga	[eː]	[e]
ĭ	I curta	[ɪ]	[e]
ī	I luenga	[iː]	[i]
ŏ	O curta	[ɔ]	[ɔ]
ō	O luenga	[oː]	[o]
ŭ	V curta	[ʊ]	[o]
ū	V luenga	[uː]	[u]
y̆	Y curta	[y]	[e]
ȳ	Y luenga	[yː]	[i]
æ	AE	[ai] > [ɛ]	[ɛ]
œ	OE	[oi] > [e]	[e]
au	AV	[au]	[au] > [ɔ]

O sistema vocalico d'o latín vulgar u sistema qualitativo italico ye una modificación d'o sistema vocalico latín orichinal que consiste en fer coincidir Ĭ curta con a Ē luenga, que converchen en una e zarrada, fer coincidir a Ŭ curta con a Ō luenga, que converchen en una o zarrada, y ubrir as vocals curtas Ě y Ŏ, que esdevienen vocals ubiertas /ɛ/ y /ɔ/. D'esta traza o sistema vocalico latín orichinal de diez vocals con distinción de cantidatz pasa a tener siet vocals, con distinción en qualidatz y obertura.

Este sistema vocalico ya se conoixe en o sieglo III, s'imposó en a pronunciación coloquial en Roma y s'estendilló por amplas zonas d'o Imperio Román d'Occident: Campania, Abruzzos, norte y centro de Pulla dica Brándiz, centro y norte d'Italia, Istria, Dalmacia, Alpes, Galia y Hispania. Ye o sistema vocalico orichinal sobre o que se desembolicoron os sistemas vocalicos d'as luengas ibero-romances, galo-romances, o retorromanico y a mes gran part d'o diasistema italián.

A denominación de "sistema vocalico d'o latín vulgar" ye comoda pero imprecisa, car nunca no bi ha habiu un solo sistema vocalico en latín vulgar, y bi n'heba d'atros por eixemplo en o latín vulgar de Cerdenya, Berbería, Sicilia, Lucania y Balcans.

Paso de Ŭ curta a "o" semiubierta

En aragonés y luengas ibero-romances y galo-romances se troba parolas on "o" derivadas de parolas que teneban Ŭ en latín clasico:

• BUCCA > "boca".
• FURCA > "forca".
• LUMBU > "lomo", "loma".
• MUSCA > "mosca".
• URSUS > "onso".
• VULPE + ARE > Golpellar (toponimo recurrent).
• PULVUS > "pols", "polvo".

Paso de Ĭ curta a "e" semiubierta

En aragonés y luengas ibero-romances y galo-romances se troba parolas on "e" derivadas de parolas que teneban Ĭ en latín clasico:

• ILLA > "ella".
• LIGNA > "lenya".
• MITTO > "(yo) meto".
• PISCE > "peix".
• STRICTU > "estreito".
• VIRIDE, VIRDE > "verde".
• SITE > "sete".
• PILU > "pelo".
• PIPERE > "pebre".
• VIDET > "(el) vey(e)".
• PIRA > "pera".

Diftongación d'as vocals curtas Ĕ y Ŏ en aragonés

O sistema vocalico de l'aragonés y luengas vecinas con cinco vocals ye una simplificación d'o sistema vocalico qualitativo italico por diftongación d'as /ɛ/ y /ɔ/ ubiertas, que esdevienen respectivament -ie- y -ue-, desapareixendo estas vocals ubiertas y a diferencia entre diferents tipos de e y o. En benasqués predomina a diftongación pero hay casos de no diftongación en os que se pronuncian as vocals ubiertas /ɛ/ y /ɔ/.

Son eixemplos en aragonés d'esta lei fonetica por a que se diftonga as vocals latinas tonicas curtas Ĕ y Ŏ:

• CĔRVU-M > ciervo
• FĔRRU-m > fierro
• TĔMPU > tiempo
• DĔNTE-M > dient
• PŎNTE-M > puent
• FŎNTE-M > fuent

Esta diftongación ya yera documentada en tiempos imperials, pero s'imposó en o centro d'Hispania en tiempos d'o Reino visigodo de Toledo quan encara no s'heban deseparau as diferents luengas ibero-romances. En o latín d'a periferia d'o Reino visigodo de Toledo se mantenió arcaizant respecto a esta lei fonetica y no diftongó estas vocals ubiertas, que se mantenioron sin diftongar en a evolución d'o sistema vocalico d'o galaico-portugués y o catalán. A muga entre a diftongación y a no diftongación se da servir como un d'os criterios pa delimitar l'aragonés y o catalán en o ribagorzano, un conchunto de parlas de transición en as que predomina a diftongación en a compleganza d'o Esera y a no diftongación en a compleganza d'a Noguera Ribagorzana. Se desviene pareixiu en as parlas de transición que bi ha entre l'astur-leyonés y o galaico-portugués.

Diftongación de Ĕ y Ŏ debant de Yod

Ta más detalles, veyer l'articlo diftongación debant de Yodveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En aragonés, en astur-leyonés, en part d'o mozarabe, y en fases primerencas d'a evolución d'o francés y talment d'o catalán se produció una diftongación debant de Yod, a diferencia d'atras luengas romanicas:

• HODIE > HOYE > huei/hué
• PŎDIU-M > pueyo

Posibles anomalias en aragonés

En part de l'aragonés actual u en aragonés cheneral se puet sentir parolas con u que d'alcuerdo con a evolución teorica habrían de tener o por derivar de parolas con Ŭ. Por eixemplo en tellán tenemos urmo, curto, buixo, cumo, manullo, sulco, puncha, que son muito comuns en aragonés.

Veyer tamién

• Diftongación debant de Yod

Bibliografía

• Heinrich Lausberg Lingüistica romanica. Tomo I fonetica Editorial Gredos.
• Rafael Lapesa Historia de la lengua española. Editorial Gredos 1981.