RAM

Modulos de memoria DDRAM-400Mhz.

A memoria RAM, de l'anglés Random Access Memory (en aragonés Memoria d'Acceso Aleatorio), ye una mena de memoria informatica, caracterizata por un acceso dreito en cualsiquier orden (aleatorio) en un tiempo constante, sin de distinción d'a posición a on que se trobe a información ni d'a posición de l'anterior lectura. Hue en día se producen por meyo de cercuitos integratos. O termin memoria RAM se emplega a sobén ta referir-se a los modulos de memoria.

Iste feito contrasta con atros mecanismos d'almadacenamiento, como as cintas u os discos magneticos y opticos, en que o dato obtenito pende d'a posición d'o capezal mobil de lectura. En istos dispositivos, o movimiento tardia más que a mesma transferencia de datos, y o tiempo d'acceso pende d'a posición fisica d'o siguient elemento.

A palabra RAM s'asocia con tipos de memoria volatils (com os modulos de memoria DRAM), a on que a información se pierde quan l'alimentación s'apaga. S'ha de saber que atros tipos de memoria tamién son RAM (d'acceso aleatorio), como a memoria ROM y un tipo de memoria flash dita NOR-Flash,

Hue en día s'emplega como memoria prencipal en totz os ordinadors personals, por ixo tamién se conoixe a sobén como memoria prencipal u externa.

En cheneral, as RAM se dividen en estaticas y dinamicas. Una memoria RAM estatica mantiene o suyo contenito inalterato mientres contine estando alimentata electricament. D'atra man en una memoria RAM dinamica a lectura ye destructiva, ye decir, que a información contenita en as suyas celulas se pierde en leyer-la.