As Crabetas

Crapetas
As Crapetas
Nomenclatura
Atros nombres:	Crabetas, Corralet d'as Crabetas, Pleyades, M45, Melotte 22
Datos d'observación (epoca J2000)
Constelación:	Tauro
Ascensión recta (α):	3h 47m 24s
Declinación (δ):	+24° 7'
Mag. aparent (V):	1.6
Astrometría
Distancia:	440 a.l. (135 pc)

As Crapetas (Crabetas u Corralet d'as Crabetas) ye o nombre con que se conoixen as Pleyades, un cumulo ubierto d'estrelas en a constelación de Tauro que se troba relativament cerca, a uns 440 anyos luz.

Només de 6 a 10 estrelas pueden estar vistas per o simple uello, pero con o telescopio se i veyen dica 3.000. As estrelas azuls y blancas luminosas son as mes visibles. Se creye que a suya edat no brinca d'os 100 millons d'anyos, y que lis ne quedan bells 250 millons més per debán.

O feito que se veigan muito de nueitz l'ha dato a las Crapetas un puesto especial en diferents culturas, antigas y modernas. Ta los vikingos, yeran pirinas d'a diosa Freya. Os maorís en dicen Mataariki, y o suyo debantamiento eliaco sinyala lo prencipio de l'anyada nueva, arredol d'o mes de chunio. Os aboríchens australianos creyeban que yeran una muller a qui Kidili, l'hombre d'a Luna, quasi heba violata. Tamién, como en muitas culturas, yeran siete chirmanas, clamatas as Makara. Diz que os nativos americanos midiban a suya percepción visual per o numero d'estrelas que podeban veyer-ie. Mesmo en l'antiga Europa, sobretot en cerclos griegos, as Crapetas yeran una preba de visión frecuent. En o Sobremont endicaban quan heba d'encomenzar o viache transuant.

Quan as crabetas salen a l'hora d'a cena, fuera pastores a tierra ajena

En Chapón las conoixen per Subaru, y la marca d'autos que porta iste nombre emplega las Pleyades como logotipo.

En a mitolochía griega, as Siete Chirmanas yeran identificatas con:

1. Alciona
2. Asterope
3. Electra
4. Maya
5. Merope
6. Taigueta
7. Celeno

Istos son es nombres que s'asinan hueii a cadaguna d'as estrelas d'o cumulo, ya que a mitolochía conta que as siete chirmanas rematoron tornando-sen estrelas. Yeran ninfas d'os monts, fillas d'Atlas y Pleyona y se suicidoron dimpués d'a muerte d'as suyas chirmanas, as Iades.