Bodiello gordo

En azul o bodiello ancho.

O bodiello ancho, cular, callar u bolsudo ye a zaguera parti d'o sistema dichestivo en os vertebratos. A suya función ye absorber l'augua d'os repuis alimentarios no dicheribles ta la suya posterior expulsión d'o cuerpo. Ye formato por o ciego y o cólon, y prencipia en a rechión iliaca d'a pelvis, a l'altaria u chusto por debaixo d'a cintura, a on que s'une con a parti inferior d'o zago. Dende aquí, contina dica l'abdomen, trescruza transversalment a cavidat abdominal y, de contino, s'endreza enta abaixo dica plegar a lo suyo punto final, l'ano. Con una largaria d'alto u baixo d'un metro y meyo, representa una cinquena parti d'a lonchitut total d'o estentino.

Dende o zago, os poquetz nutrients que no han estato dicheritos previament, y parti de l'augua, pasan a lo bodiello ancho a traviés d'un aniello muscular que mira que os alimentos no tornen a lo zago. O bodiello ancho necesita de 10 a 12 horas ta rematar a resta d'o proceso. En ista fase, ya no contina procesando-se os alimentos; o bodiello ancho simplament absorbe as vitaminas, (por eixemplo a vitamina K), creyatas por as bacterias que habitan en o cólon y l'augua restant, compacta os excrementos y almadazena la materia fecal en o recto dica que sía eliminata por l'ano.

A diferencia más important con o zago ye que ye más amplo y que presenta una napa muscular lonchitudinal que se reduce a tres estructuras en forma de correya, de bells 5 milimetros d'amplaria, conoixitas como taeniae coli, que prencipian en a base de l'apéndiz y s'estendillan dende o ciego dica lo recto. A suya paret s'alinia con o epitelio columnar simple y, en cuentas de tener as vellosidatz d'o zago, o bodielo ancho presenta glandulas intestinals. Encara que os dos intestins tienen celulas en forma de cáliz, en o bodiello ancho són más numerosas.

L'apéndiz, que ye unito a la superficie posteromedial d'o bodiello ancho, contiene masas de teixito limfoide. L'apendicitis ye o resultato d'un bloqueyo que agafa material infectato en a cavidat, pero l'apéndiz, si ye menester, se puet quitar sin garra periglo ni conseqüencia ta o pacient, ya que pareixe un remanent d'a evolución y que no tién denguna función conoixita en l'actualitat.