Fauvismo

O faubismo ye un estilo pictorico, d'orichen franzés, carauterizato per l'uso de colors intensas, puras e espresibas, e per una simplificazión de as formas, as perspectibas e as guambras. Estió lo primero de os prenzipals mobimientos pictoricos espresionistas apareixitos ta las primerías de o sieglo XX, si bien no tenió guaire durada.

O mobimiento ganó importanzia en rancando de a esposizión de bels faubistas en o Salón d'Agüerro (Salon d'Automne) de 1905, en París. L'orichen de a denominazión se troba en a frase de o critico franzés Louis Vauxcelles, qui esclamó "Donatello au milieu des fauves!" (Donatello entre as bestias furas!), referindo-se á una escultura d'estilo cuatrezentista que yera en metá d'a galería.

A fegura capezera de o mobimiento estió Henri Matisse. Belaltros artistas consideratos faubistas -anque ta muitos no sinificó que cualquecosa temporal- estioron André Derain, Albert Marquet, Maurice de Vlaminck, Georges Rouault, Raoul Dufy, Georges Braque e Kees van Dongen.

En o faubismo se perziben bellas enfluyenzias, como a de os neoimpresionistas u a de os postimpresionistas Cézanne, Gauguin e Van Gogh. O estilo, debez, enfluyó considerablemén en muitos de os mobimientos posteriors de o espresionismo europeu.