Fosal

Fosal Rochus, en Nuremberg

Fosal en Gjemnes (Noruega)

Un fosal u cimenterio ye o puesto a on s'apedecan os calávers d'os muertos. Pendendo d'a cultura de cada país, os cuerpos se pueden deixar en un sarcofago u simplament se pueden envolver en una tela. Dimpués pueden estar apedecatos baixo tierra, mesos en un panteyón u en unatro tipo de sepoltura.

A palabra fosal viene d'o latín fossa, con o mesmo significato en aragonés de fuesa, sepulcre u foya t'apedecar os calávers. D'atra man cimenterio tien o suyo orichen en o griego koimetérion (κοιμητήριον) a travies d'o latín coemeterĭum que tien o significato de dormitorio, ya que seguntes a creyencia cristiana, a o cimenterio se'n iba a dormir dica l'inte d'a resurrección.

A sobén os fosals son comunitarios, ye decir, en un puesto bi ha fuesas de muitos miembros d'una comunidat, sin que por ixo as fuesas sían comunitarias, ya que cada defunto tien o suyo propio espacio determinato, y por decisión d'una familia puede estar apedecato un familiar en o mesmo puesto que un atro.

Os fosals cristians se conoixen tamién a vegatas con o nombre de camposanto u sagrero. Os antigos fosals meyevals con fuesas antropomorfas picatas en a penya gosan conoixer-se como fosals d'os moros

A mayoría de fosals se destinan a calávers humans, manimenos tamién bi ha fosals d'animals t'apedecar a las mascotas muertas.