Sant Bertolomeu

Bertolomeu u Bertolomé estió uno d'os Apóstols de Chesús. O suyo nombre (en griego Βαρθολομαίος) procede d'o patronimico arameu bar-Tôlmay, "fillo de Tôlmai" u "fillo de Ptolomeu". Ye mencionato en os tres evanchelios sinopticos, siempre en companyía de Felipe (Mt 10:3; Mc 3:18; Lc 6:14). En o Evanchelio de Chuan, on no aparix con o nombre de Bertolomeu, lo han identificato con Natanael, que tamién ye relacionato siempre con Felipe.

Seguntes o Evanchelio de Chuan, Natanael estió uno d'os diciplos a los que Chesús s'aparixió en a Mar de Tiberiades dimpués d'a suya resurreción (Chn 21:2). Seguntes os Feitos d'os Apostols, estió tamién testigo d'a ascensión de Chesús (Fe 1:13).

Seguntes una tradición replegata por Eusebio de Cesaria, Bartolomeu se'n fue a la India a predicar l'evanchelio, on dixó una copia d'o Evanchelio de Mateu en arameu. A tradición armenia li atribuye tamién a predicación d'o cristianismo en a tradición d'este antigo pueblo, chunto a San Chudas Tadeu. Os dos son consideratos santos patrons d'a Ilesia Apostolica Armenia.

Sant Bertolomeu en fuents aragonesas

Lo mencionan en o "Libro d'el Trasoro" y dicen:

Sant Bartolome preico entre los joyos e traslato el euangelio de Sant Matheu en lur lenguaie. E a la fin fue soterrado el en la Jndia por los barbaros en la grant...

Tamién lo mencionan en a "Cronica d'Espanya" de García de Eugui:

Jtem Sant Phelip con sus fijos fue soterrado en Joral. Jtem Sant Bertholomeu en Nanarbon una çiudat que es en Armenia la mayor; & Sant Tomas en Galaba una çiudat que es en Judea;...

Lugars d'Aragón on celebran Sant Bertolomeu

• Alcalá de Gurrea.
• Bardallur.
• Bezeit.
• Bulbuent.
• Calatorau.
• La Canyadiella.
• Canyizar de l'Olivar.
• Castellón d'Alarba.
• Chisagüés.
• Contamina.
• Cortz d'Aragón.
• La Chinebrosa.
• Fuent Buena.
• Fuents Calients.
• Gabín.
• Isuerre.
• La Mata de los Olmos.
• Morillo de Galligo.
• Odón.
• Orés.
• Peralellos.
• Retascón.
• Romanos.
• Santa Cruz de Nogueras.
• Senés d'Alcubierre.
• Tosos.
• Villar Luengo.