Oclusivas xordas intervocalicas

As oclusibas xordas interbocalicas son a P, T, K, fonemas xordos y oclusibos que esistiban en latín. En muitas zonas de l'imperio oczidental teneban tendenzia a sonorizar dando B, D, G. En rumano y dialeutos italians meridionals se conserban xordas. En gallaico-portugués, Astur-lionés, castellán, oczitán, franzés, francoprobenzal y dialeutos noritalicos sonorizan y se creye que ye por sustrato zelta. As lenguas zeltas actuals tienen como carauteristica a sonorizazión d'estos fonemas indouropeyos.

L'aragonés y o gascón encara que sigan en Europa Oczidental tienen resistenzia a la sonorización y conserban muitos casos de xordas interbocalicas latinas. Se sabe que esistiban más casos en a Edat meya. A sonorización en elementos romanzes dentro de testos latinos de a epoca de Remiro I se produziba en poquez casos, pero en testos de a epoca d'Alifonso I se produziba en a más gran parte de os casos, y mesmo casos de ipercorreuzión. Se creye que a resistenzia a la sonorizazión ye por sustrato basco-aquitano.

Esistiba tamién resistenzia á a sonorizazión en bels dialeutos mozarabes, como o mozarabe lebantino, y o castellán prene d'este a palabra horchata, (que tiene orichen parellano con orzuelo y con l'aragonés ordio/güerdio). En este caso se puede pensar en sustrato ibero.