Turcople

Un Turcople (d'o griego bizantín τουρκoπουλος, "fillo de turco", yera un mercenario por un regular d'orichen turco y a sobén de pai turco y mai griega. Os turcoples formaban un cuerpo de caballería lichera y bi heba muitos turcoples a lo servicio d'as ordens melitars establitas en Chipre, Cherusalem y Rodas mientres as Cruzatas (sieglos XI e XIII). Bells turcoples s'adhibioron a las tropas almogávars.

As tropas cruzatas topetoron por primera vegata con os turcoples en a Primera Cruzata. A huest turcople feba part d'o exercito bizantín en condición de tropas auxiliars. A mayoría d'os turcoples yeran fillos de pai turco y mai griega y nominalment cristians. As unidatz turcoples acompanyaban a lo exercito bizantín en a primera cruzata talment inspiroron o costumbre d'os estatos cruzatos de contratar tropas auxiliars de caballería lichera indichena.

En os estatos cruzatos as tropas turcoples no yeran necesariament de turcos u mestizos, a mayoría proveniban d'o reclutamiento de turcos selchucidas cristianizatos y d'habitants de Siria.

En Tierra Santa as tropas turcoples serviban como caballería lichera fendo funcions d'exploradors, fustigadors, arquers u a caballo y bella vegata como segunda linia de carga dezaga a caballería pesata. As tropas teneban un equipamiento d'armaduras licheras (por un regular un peto con guata y un casco conico de fierro) y iban armatas con lanzas y arcos, as monturas yeran més licheras y rapidas que as d'os caballers d'as tropas occidentals.

En as ordens melitars as tropas turcoples yeran baixo o mando d'un "turcoplero", que yera designato por as suyas tropas. Encara que quan no yeran en batalla as tropas yeran sozmesas a restriccions como no minchar en a mesma mesa que atros soldatos, o turcopler teneba un rango en o comandamiento templero superior a los sarchentos d'a orden. O turcopler reportaba dreitament a lo Gran Mayestre u a lo Mariscal mientres a batalla, y en batalla comandaba las tropas turcoples y a los fraires sarchentos.

Os Mamelucos consideraban a los turcoples como traidors y apostatas y los mataban quan los ensopinaban. En 1291 con a Caita de Sant Chuan d'Acre, o zaguer bastión d'os Cruzatos en Tierra Santa, os turcoples supervivients s'establioron en Chipre con a Orden d'o Temple y en Rodas y Malta chunto con a Orden d'o Hespital. A Orden Teutonica posó de nombre Turkopolen a la suya propia caballería lichera por o prestichio que teneban estas tropas.

O exercito bizantín siguió contando con o servicio d'os turcoples como tropas auxiliars, y quan os almogávars luitoron como mercenarios pa os bizantins tenioron contacto con os turcoples, adhibindo-se-ne en a Companyía d'Orient uns 1.000. Manimenos os turcoples participoron en l'asesinato de Roger de Flor y la mortalera d'almogávars o 4 d'abril de 1305 en Adrianopoli, y tamién participoron en a represión bizantina contra os almogávars. Con tot y con ixo en 1306 bellas unidatz turcoples s'adhibioron a los almogávars quan resistiban os ataques los bizantins y se vengaban y siguioron a la companyía en a suya migración t'Atenas. Quan os almogávars s'establioron en o ducato d'Atenas os turcoples los abandonoron y entroron a lo servicio d'o prencipe de Serbia capitaneyatos por Meleco.