Correchimiento

Un correchimiento yera, en o Dreito castellán, una división almenistrativa establita en a Edat Meya, dirichita por un correchidor, con una amplaria semilar a la d'una d'as actuals comarcas. Quan, por os Decretos de Nueva Planta, se suprimió o Dreito Politico propio d'os territorios d'a Corona d'Aragón, se suprimioron as divisions almenistrativas propias d'Aragón, sustituyitas por ista institución castellana, que tamién s'emplegaba ta los territorios conquiestos por o Reino de Castiella en America.

En 1833 desapareixioron os correchimientos, quan Javier de Burgos creyó l'actual división territorial en Espanya en provincias.

Correchimientos en Aragón

Dimpués d'os Decretos de Nueva Planta, s'establioron en Aragón os siguients 14 "correchimientos", reduciendose a 13 cuan en 1716 desaparixió o correchimiento de Carinyena:

• Correchimiento de Zaragoza
• Correchimiento de Calatayú
• Correchimiento de Daroca
• Correchimiento de Teruel
• Correchimiento de Albarrazín
• Correchimiento d'Uesca
• Correchimiento de Tarazona
• Correchimiento de Borcha
• Correchimiento de Ribagorza
• Correchimiento de Balbastro
• Correchimiento de Carinyena
• Correchimiento de Chaca
• Correchimiento d'as Cinco Villas, con capital en Eixeya d'os Caballers. No nomás incluyiba l'actual comarca d'as Cinco Villas, sino tamién os territorios de l'actual partito chudicial d'Eixeya d'os Caballers que fan parte d'as comarcas d'a Plana de Uesca y d'a Chacetania, a más d'atros territorios en os Perineus, incluyendo-ie a val d'Echo.
• Correchimiento d'Alcanyiz

Se veiga tamién

• Correchidor

Bibliografía

• GIMÉNEZ LÓPEZ, E. La Nueva Planta de Aragón: corregimientos y corregidores en el reinado de Felipe V. Argensola: Revista de Ciencias Sociales del Instituto de Estudios Altoaragoneses, ISSN 0518-4088, Nº 101, 1988, pp. 9-50.
• GIMÉNEZ LÓPEZ, E. y IRLES VICENTE, Mª. C. La Nueva Planta de Aragón: División y evolución corregimental durante el siglo XVIII. Studia historica. Historia moderna, ISSN 0213-2079, Nº 15, 1996, págs. 63-82
• MORENO NIEVES, J.A. Los municipios aragoneses tras la Nueva Planta: la nueva administración y su personal político. Revista de Historia Moderna, nº 13-14, 1995, pp. 165-184.