Baixkirs

Os baxquirs son un grupo etnico que habita en a Republica de Baixquiria (Rusia) y en a zona de Rusia que bi ha entre Baixquiria y a muga de Cazaquistán en un territorio entre o sud d'os Urals y o curso meyo d'a Volga. Charran una luenga turquesa propia y son musulmans sunnitas que siguen a escuela hanafí.

Os modos de vida y ocupacions tradicionals encara yeran vichents a prencipios d'o sieglo XX:

• En as planas orientals de Baixquiria yeran pastors trasuants que viviban en casas de fusta y migraban en verato ta unas tascas on viviban en tiendas.
• Os d'a zona montanyosa central pasaban l'hibierno en casas de fusta, pero en verano se moveban ta viviendas temporals de fusta. Entre as suyas actividatz tradicionals yeran a caza, l'apicultura y a talla de fusta.
• Os d'a zona norte no se moveban en verano u yeran agricultors y apicultors.

Luenga

O baxquir s'ha desembolicato como luenga escrita en o sieglo XX por a politica sovietica de luengas minoritarias, enantes yeran baixo a influencia cultural d'os tartres de Kazán y feban servir o tartre, luenga que con o tiempo puet estar que ese sustituito a lo baixquir. En as zonas occidentals de Baixquiria bi ha muita chent que son bilingües baixquir-tartre. Dica 1928 escribiban en alfabeto arabico, entre 1928 y 1939 escribiban en alfabeto latín, y dende 1939 escriben en alfabeto zirilico.

Historia

En a zona ocupata por os baixquirs viviban enantes d'a conquiesta mongola cumans y pueblos uralicos. Se crei que os hongaros son orichinarios de Baixquiria y estioron unas tribus empentatas u arrastratas por a estepa d'Europa Oriental en as migrazions d'os pueblos turqueses enta Europa). Ye posible que l'orichen d'os baixquirs siga a turquización de poblacions ugrias por contacto con cumans primero y tartres dimpués. D'alcuerdo con esto os baixquirs d'o norte y ueste estioron pueblos uralicos, (ugrios u fineses) turquizatos y os baxquirs d'o sud y este estioron pueblos turqueses nomadas emparentatos con os nogais y cazacos.

Os Baixquirs estioron baixo o gubierno d'a Horda d'Oro y dimpués baixo a influencia u ocupación d'os Khanatos de Kazán, Sibir y Nogai con qui mugaban por l'ueste, este y sud respectivament. A prencipios d'o sieglo XVII os rusos entroron en as tierras d'os Baixquirs, y en vinients 200 anyos los sozmetioron gradualment. Os baixquirs no sufrioron a presión misionera rusa y tienen un islam menos defensivo que os tartres. Atra diferencia ye que a chent d'o campo baixquir fue liberata d'a servitut en o sieglo XVIII y dica a revolución rusa mantenioron una aristocracia tribal y nunca tenioron una burguesía comercial. En tiempos d'os zars os baixquirs participoron en as revueltas de Pugachev y Stenka Razin. O millor lugartenient de Pugachev, Salavat Yulaev yera baixquir.

En 1917 os Baixquirs tenioron o suyo propio gubierno. En a guerra civil rusa primero yeran de parte d'o exercito blanco, pero en 1919 o president d'o gobierno baixquir Zeki Velidi Togan s'alinió con os bolcheviques por a promesa d'autonomía y aportó a lo exercito royo o suyo Rechimiento Nacional Baixquir con 2000 combatients disciplinatos y con experiencia. A participación d'os Baixquirs estió decisiva pa a victoria roya. Dimpués Zeki Velidi Togan quedó desencantato con os bolchebiques y fuyó ta Turquestén sumando-se a la rebelión d'os Basmachis. En 1920 os sovieticos consiguioron dominar-los y en 1922 se creyó a Republica Sovietica Autonoma de Baixquiria. L'actual territorio ruso que desepara Baxquiria de Cazaquistán estió tradicionalment un territorio poblato por baixquirs y tartres y fue anexionato por Rusia quan s'establió a Republica Socialista Sovietica Autonoma de Baixquiria.

En tiempos d'os bolchebiques en Baxquiria costruyoron muitas plantas industrials y esto trayó una inmigración masiva de rusos y tartres. Os baixquirs, que permaneixioron en as zonas rurals quedoron en desaventalla debant d'esta población urbana forana. En Ufa en 1990 o 58 % yeran rusos y o 25 % tartres, no estando que o 9 % os baixquirs. Os baixquirs veyen un periglo de ser asimilatos por os tartres en bellas zonas.

Bibliografía

• Amiram Gonen DICCIONARIO DE LOS PUEBLOS DEL MUNDO. 1996 Anaya&Mario Muchnik.
• Felipe Fernández-Armesto. LOS HIJOS DE ZEUS. PUEBLOS, ETNIAS Y CULTURAS DE EUROPA. 1996 Grijalbo.