Estau de conservación d'especies

O estato de conservación d'una especie ye la mida de probabilidat que ixa remane existindo en o futuro, parando-ie cuentas no nomás que ta o volumen de población actual si que tamién t'as tendencias amostratas per a especie a traviés d'os tiempos, d'a existencia de predadors u altras menazas, d'as modificacions previstas d'o suyo habitat, ecetra.

A más difundita d'as clasificacions posibles ta os estatos de conservación ye la que elaboró a Unión Internacional por a Conservación d'a Naturaleza (conoixita por as sieglas anglesas IUCN), a on que se compilan os datos d'a clamata Lista Roya d'as Especies Menazatas. A zaguera versión d'ixa clasificación fue publicata en o 2004 y distingue as siguients ueito categorías:

No Evaluato (NE)

Quan que no se tienen datos de garra estudeos sobre d'a viabilidat d'a especie, y temporalment son adscritos ent'a categoría No Evaluatos.

Datos Insuficients (DD)

Quan que os datos que se tienen d'a especie son desactualizatos u insuficients en qualidat y cantidat ta poder-ne decidir si a especie ye viable u no. Alavez, s'endica como a Insuficientment Datata. Ixo no quier pas decir que la especie sía fuera de periglo. Manimenos a sobén a manca de datos provién precisament de l'esparzo lumero d'exemplars.

Periglo Baixo (LR)

A especie ha estato evaluata y os resultatos d'ixa evaluación diz que no mi ha razons ta considerar-la a garra d'as categorías más preocupadoras. Con a excepción d'os animals domesticos y d'o ser humano, que no están comprenditos en a clasificación, totas as especies no menazatas se troban dintro d'ista categoría, a qualsiquiera d'as suyas tres soz-categorías.

Preocupación Menima (LC): A especie no cumple garra d'os criterios ta estar aconsiderata como a mereixedera de garra mesura de proteción.

Amanata t'a Vulnerabilidat (NT): A especie no ye obchecto de garra mesura de protección, anque as suyas poblacions son escasas u bien se troban restrinchitas a un habitat prou restrinchito u que proximament en será.

Pendient de Mesuras t'a Conservación (CD): A especie podería estar dintro d'altras categorías de periglo más grans si no porque estás protechita por mesuras que ne regulan a existenxia.

Vulnerable (VU)

A especie se troba menazata d'extinción sía por o descenso d'a población, por a degradación d'o suyo hábitat, a introducción de parasitos u competidors, a fragmentación d'os suyos nuclios poblacionals u qualsiquier altra enchaquia que faiga posibles eventos posteriors u catastrofes que la exterminen posteriorment.

En Periglo (EN)

A especie se troba en periglo d'extinción inminent, sía por un descenso estimato observato d'a metat d'a suya población en a suya decada, por a existencia de menos de 2500 exemplars adultos, por a restricción d'o suyo hábitat dica quotas por baixo d'os 5000 Km², u altras causas.

En Periglo Critico (CR)

A especie ye menazata d'extincion en un futuro inmediato, sía por a desapareixencia d'alto ta un 80% d'os suyos miembros, u por a existencia de menos de 250 exemplars adultos, u por a restricción d'a suya aria de destribución ta 100 Km<sup<2 u menos.

Extinguito en estato salvache (EW)

No s'han puesto trobar exemplars vivos d'a especie en o suyo meyo natural encara que se n'haigan feto estudeos exhaustivos, y se considera que nomás que son conservatos exemplars en caultivo u cautividat.

Extinguito (EX)

Dimpués d'estudear-se exhaustivament o suyo hábitat, no bi ha garra dandalo razonable que o zaguer exemplar d'a especie no sía muerto.

Os estatos de conservación en Biquipedia

Biquipedia endica o estato de conservación d'as especies con as categorías emplegatas por a IUCN, anque con dos salvedatz:

• Quan as especies son extinguitas, s'endica tamién si s'extinción en tiempos historicos u se conoix nomás que por o rechistro fosil. As especies dintro d'esta categoría, lochicament, nunca no estión examinatas por a IUCN.

• O estatus d'as especies domesticas, que a IUCN no contempla pas, s'indica como a "Domestico" u "Domestica", u más simplerament "No Menazato".

Enrastres externos

• (es) Categorías d'a IUCN en a suya versión d'o 2001
• (en) Motor de chira informatizato ta especies en a Lista Roya d'a IUCN