Malnutrición

Nina con sintomas importants de desnutrición. A fotografía, de zaguerías d'os anyos 60, amostra un d'os muitos casos de kwashiorkor trobatos en os campamentos de refuchiatos nicherians mientres a guerra entre Nicheria y Biafra.

A malnutrición ye un termin cheneral emplegato ta describir una condición sanitaria causata por una inadequata u insuficient alimentación y nutrición; por una alimentación incorrecta que resulta d'una asimilación deficient, una dieta probe u una sobrealimentación. En función d'os nutrients que se troban de traza deficient u en exceso en a dieta, pueden producir-se una serie de trastornos d'a nutrición.

A Organización Mundial d'a Salut nombra la fambre como a más grieu amenaza ta o mundo d'a salut publica. A desnutrición ye, por muito, o mayor contribuyent a la mortalitat infantil, present en a metat d'os casos de muerte. A malnutrición, en a forma d'a manca de yodo ye a causa más común de deficiencia u retardo mental, a reducción d'o cocient intelectual d'o mundo con una estimación de mil millons de puntos. A millora en o estato de nutrición d'a población ye l'acción que, de traza mayoritaria, se considera como a forma más eficaz d'aduya debant d'iste problema.

A malnutrición ye o resultato d'una alimentación incorrecta, ya siga por alimentación deficitaria, una sobrealimentación u por asimilación deficient. Os alimentos que se prenen diariament mos proporcionan a enerchía necesaria ta poder fer as nuestras actividatz diarias. A manca u o exceso d'alimentos puet prevocar malautías.

A malnutrición ocasionata por alimentación incorrecta por defecto de nutrients ha representato a fambre en a mayoría d'os países d'o mundo dica o sieglo XVII y encara en os siguients. Autualment contina i habendo una desnutrición d'un grau variable en muitas zonas subdesarrollatas economicament más que más d'Africa, Asia y America d'o Sud. A la vegata en os países más ricos y atros meyanament desembolicatos, a obesidat ha puyato tanto que se considera un d'os prencipals problemas ta la salut d'a población.

A malnutrición por asimilación deficient ye a menos important d'as tres causas de malnutrición y a sola en a quala en o suyo alcanze no i tienen un paper preponderant factors socials y economicos. O progreso d'a medecina ha disminuito muito a incidencia d'os trastornos por asimilación deficient d'os alimentos.