Kurdistán

O Kurdistán ye un territorio d'Orient Meyo abitato por os kurdos e que os nazionalistas kurdos reibindican pa que esdebienga un país independient chestionato por o pueblo kurdo.

En parte d'o Kurdistán os kurdos han ido ocupando dende a Edat Meya territorios que abitaban as poblazions sirianas, neoasirianas e armenias quan os embasors turqueses e mongols d'Asia Zentral debastaban o país e no permitiban o mantenimiento d'un modo de bida agricola sedentario. Os emperadors otomans e persas tamién faborexioron a los kurdos, asentando-los en a muga común d'os imperios como etnia-tampón. A mayoría d'os zaguers nuclios de cristians autoctonos (sirians de Tur Abdin, neoasirians de Hakkari e armenios de Van) desaparexioron birtualment con as mortaleras d'a Primera Guerra Mundial (segunda fase d'o chenozidio armenio).

A parte d'ixos restos de minorias autoctonas en o Kurdistán os kurdos combiben con arabes, turcos, turcomans e azerís. D'esta traza a delimitazión d'o territorio reclamato por os kurdos choca con as aspirazions territorials u reibindicazions d'as etnias bizinas.