Astronomía

Nebulosa planetaria d'a forniga Menzel 3 (Mz3).

L'astronomía, que significa etimolochicament "o conoiximiento d'as estrelas" ye a sciencia que estudia l'universo y os cuerpos celestes u astros, tanto a suya posición y movimiento en o firmamento como a suya naturaleza, estructura y evolución (astrofesica). Ye ista una d'as pocas brancas scientificas en as que os investigadors aficionatos encara pueden fer contribucions importants.

Anque comparten un orichen común, no cal confundir l'astronomía con l'astrolochía, que ye una pseudosciencia emplegata dende antigo como arte devinatoria que se mira de predecir o destín por meyo d'a observación d'a posición d'os astros.

En aragonés meyeval bi ha textos que parlan d'astronomía y astrolochía en o "Secreta Secretorum", en o "Libro del Trasoro" y en o "Libro d'as Marabillas d'o Mundo". Encara que podamos leyer astronomja en o "Libro d'el Trasoro", encara no la diferencian de l'astrolochía:

La quarta sciencia es ast(r)onomja q(ue) nos amuestra todo el ordenamj(ent)o del çielo e del firmamj(ent)o e delas strellas e el curso delas vij planetas por su Zodiacha - y(e)s a saber por medio delos .xij. signos - e como se mueue(n) los t(iem)pos en caljent en frio en pluuja o en seq(ue)dat o en viento, por Razo(n) q(ue) yes ordenada en las strellas