Gravedat

Dos cuerpos de masa "M" y "m" situatos a una distancia "r" s'atrayen con una fuerza "F".

A grabedat mantiene a los planetas chirando arredol d'o sol.

A grabedat ye a fuerza d'atrazión mutua que esperimentan dos ochetos con masa. Se tracta d'una d'as quatre fuerzas fundamentals oserbatas dica agora en a naturaleza chunto con a fuerza eletromagnetica, a fuerza nucleyar débil e a fuerza nucleyar fuerte.

A grabedat ye amás important respeuto a lo funzionamiento de l'uniberso: as fuerzas nucleyars son de tan curto alcanze que nomás se manifiestan en o mundo atomico e subatomico; a fuerza eletromagnetica puet autuar en cualsiquier distanzia, pero se basa en a esistenzia de dos tipos de cargas (a positiba e a negatiba, que esisten en igual cantidat) de maniera que cargas diferents s'atrayen e cargas iguals se repelen, u sía que o resultato a gran escala ye neutro. D'atra man a fuerza d'a grabedat ye siempre atrautiba e autua en cualsiquier distanzia, por ixo ye siempre present en toz os puestos. Ella ye a causant de que a Tierra chire arredol d'o Sol (entre os cualos bi ha más de 150 millons de quilometros) e de que o Sol se mueba arredol d'o centro d'a Carrera de San Chaime (á más de 25 mil años luz de distanzia). Amás d'ixo, a fuerza grabitatoria ye, d'entre as quatre fuerzas fundamentals, la que menos entienden os fesicos modernos. Istos aspiran a formular a Gran Tioría Unificata, a on que as quatre fuerzas sían unitas en un modelo fesico que describa o comportamiento de l'uniberso como un tot. Dica l'inte, a fuerza d'a grabedat ye amás problematica, la que se resiste a la unión.

Siempre s'ha dito que a grabedat nos atraye enta o centro d'a Tierra; pero si analizamos detenidament a forma en que un ocheto masibo "deforma" o espazio-tiempo que lo rodía plegaremos a la conclusión de que no ye una fuerza que nos atraye, sino más bien una fuerza que nos empenta enta lo centro d'un cuerpo masibo, en iste caso a Tierra. Por tanto, aberbanos de dezir: "A grabedat ye a fuerza que empenta un ocheto masibo enta o centro d'unatro más masibo".

Enrastres externos

• Se veigan as imáchens de Commons sobre a gravedat.