Terminación -uela (toponimia)

A Terminación -uela ye común en a toponimia aragonesa (en concreto a provincia de Teruel), encara que ye present en muitas atras zonas. Se relaciona con o sufixo -uelo, y ye un claro derivato d'o sufixo latín -OLUS. Indica lugars chicotz.

Pa bells autors ye un diminutivo aplicato a un lugar que primero se diciba sin de deminutivo, como en os zaguers sieglos s'ha desvenito con o diminutibo -ico en os casos de El Colladico (Collado de Per Esteban), Samperico Lagaga (Sant Per de Lagata), u Las Masadicas Royas (nombre antigo d'Andorra que talment se deciba enantes en aragonés "Las Masadas Royas").

Pa belatros ye una fosilización d'o diminutivo latín -olus en lugars por on pasaban calzatas romanas.

En a toponimia tamién se troba a forma masculina d'este sufixo, como en "Teruel", "Pallaruelo", "Pozuelo"/"Pozuel", "Pedruel", "Rubiuelos", pero no tan a sobén.

En os decumentos meyevals a sobén amanixen latinizatos con -ola, y a vegatas como olla marcando una l cheminata por hipercorrección grafica, pero que en os casos de "Rubiellos" pueden esplicar-se por influencia ortografica d'o catalán, on se prenuncia una l cheminata dezaga de e u i, (clorofil·la, goril·la).

O diftongo -ue- desembolica dezaga d'una -r- una pronunciación /güé/, como en /Esquirgüelo/ u /Zirgüello/, pronunciación que no siempre ye posible de testimoniar en os textos antigos y a vegatas ye marcata con una -h-, (Cabrihuel, Terhuel, Noguerhuelas, Ruvihuelos). D'alcuerdo con as normas ortograficas de l'Academia de l'Aragonés esta g no s'escribe: Esquiruelo, Teruel, ecetra.

Lista de toponimos con sufixo -uela en Aragón

• Abelluela.
• Veruela.
• Escariuela.
• Esteruelas.
• Cosculluela.
• Ferreruela.
• Figueruelas.
• La Iglesuela.
• Lagueruela.
• Lanzuela.
• Mosqueruela.
• Moyuela.
• Nogueruelas.
• Royuela.
• Sarzuela de la Loma.
• Cerveruela.

Veyer tamién

• Sufixo -uelo