Protista

Protista
Clasificación scientifica
Dominio: Eukarya Reino: Protista
Phylla
Primoplantae (en parti) Rhodophyta Glaucophyta Chromista Heterokontophyta Haptophyta Cryptophyta Alveolata Pyrrhophyta Apicomplexa Ciliophora Excavata Metamonada Euglenozoa Percolozoa Rhizaria Radiolaria Foraminifera Cercozoa Amoebozoa Opisthokonta (en parti) Choanozoa

Os protistas (Protista) son un grupo diberso de microorganismos eucariotas. Historicament, os protistas yeran consideratos como un reino distinto, pero iste grupo ya no ye reconoxito en a taxonomía actual. Os protistas no tienen guaire cosa en común a parti d'una organizazión relatibament simpla – u bien son unizelulars u bien son multizelulars sin de texitos espezializatos. Ista organizazión zelular simpla diferenzia os protistas d'a resta d'eucariotas, como os fongos, os animals e as plantas. De feito, lo suyo estilo de bida ye bien pareixito a lo d'os procariotas. A mayoría d'organismos eucariotas son protistas.

O reino Protista fue emplegato orichinalment en 1866 por Ernst Haeckel. Os protistas yeran subdibiditos tradizionalment en dibersos grupos seguntes os suyos pareixitos con os reinos "superiors": os protozoos unizelulars, parellans a los animals; os protofitins, mayoritariament algas unizelulars parellanas a las plantas; e os mixomizetes e oomizetes, parellans a los fongos. Como istos grupos a sobén s'entibocaban, han estato sustituyitos por clasificazions basatas en a filochenia. Manimenos, encara resultan útils como nombres informals ta describir a morfolochía e ecolochía d'os protistas.

Os protistas biben en cuasi cualsiquier meyo que contenga augua liquida. Muitos protistas, como as algas, son fotosinteticos e son produtors primarios esenzials d'os ecosistemas, espezialment en l'ocián, a on que fan parti d'o plancton. Atros protistas, como os zinetoplastos e os apicomplexos, son a causa d'una bariedat de malautías umanas grieus, como a malaria e a malautía d'o suenio.