Jean-Jacques Rousseau

Jean-Jacques Rousseau (Chinevra, Suiza, 28 de chunio de 1712 – Ermenonville, Francia, 2 de chulio de 1778) estió un d'os prenzipals filosofos d'o sieglo d'as luzes en luenga franzesa, manimenos as suyas ideyas e o suyo carauter l'oposaron a sobén a d'atros ilustratos e a los ideyals d'o mobimiento.

A filosofía politica de Rousseau se situa aintro d'a corrient contractualista d'os filosofos britanicos d'os sieglos XVII e XVIII, e o suyo famoso Descurso sobre l'orichen e fundamentos d'a desigualdat entre os ombres ye conzebito como un dialogo ubierto con a obra de Thomas Hobbes. Precursor d'o pensamiento democratico, o suyo punto de partita ye una cretica contra la inchenuidat d'o pensamiento ilustrato, más que más en o papel que a Ilustrazión otorgó a la cultura e a lo conoximiento como probeyedor de bondat. Esfensó que a cultura ye una capa de combenzions e arbitrariedaz que se superposa a l'ombre orichinario, ye dezir, natural, e que por tanto falseya e esmalizia las condicions superiors que o ser umán poseye de manera intrinseca. L'artifizialidat d'os regles forman a soziedat e o lenguache d'os diferents pueblos, que negan a los indibiduos a posibilidat d'una reyalizazión plena como tals e malmeten o suyo ser natural. A suya considerazión d'o ser umán como indibiduo cultural ye a base d'os fundamentos d'a etnolochía moderna, como siñaló Claude Lévi-Strauss.

A suya obra iconoclasta d'antizipó a las tiorías eboluzionistas de Charles Darwin. O suyo herencio de pensador radical y reboluzionario ye probablement millor esprisato en a suya frase más famosa, encluyita en o Contrato Sozial:

L'ombre naxe libre, pero en toz costatos ye encadenato.

As suyas ideyas politicas influyoron en a Revolución Francesa y en o desenvolique d'as teorías liberals y nazionalistas. Ye conoixito, particularment, por os suyos treballos sobre ombre, a sociedat y a educación.