Plana

Iste articlo tracta sobre a plana como forma de relieve. Ta altros usos d'o termin «plana» se veiga Plana (desambigación).

campos de cerial en a plana d'o baixo Danuvio

Una plana u plan ye un aria con relieve relativament plan. As planas son a sobén resultato d'un proceso erosivo continato en o tiempo (superficies d'erosión), encara que en o caso d'as riberas son producto d'a sedimentación fluvial (planas aluvials), que pueden estar formando diferents livels (faixas fluvials).

Seguntes a extensión as planas u plans pueden recibir a denominación de "planetas", "planazos", "planadas" u "esplanadas", orichinando toponimos con larga persistencia en o tiempo e que se conservan en a toponimia sieglos dimpués d'a castellanización. Bi ha muitos toponimos que tienen a parabra "Plano" acompanyata de l'articlo.

Tipos de planas

• Plana abisal, una zona plana u con una pendient muito suave d'o fondo ocianico.
• Plana aluvial u Plana d'inundación, formata por o deposito de materials acarreyatos por os ríos e que esdevienen fluvisols.
• Plana d'erosión, plana que se forma en un proceso luengo d'erosión dimpués d'haber rematato os procesos d'orochenesis.
• Plana costera, plana paralela a la costa.