Emprenyadura
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
A emprenyadura[1][nota 1], prenyau,[2][1][nota 2] u embarazo[2][1][nota 3] se refiere a lo proceso posterior a la fecundación d'un ovulo por o espermatozoide, por o cual se desembolica un nuevo individuo d'a especie adintro d'o cuerpo d'a mai, dica l'inte d'o parto; fa referencia a iste periodo de tiempo entre a fecundación y o parto. A chestación[1] incluye toz os procesos fisiolochicos de creiximiento y desembolique d'o feto en l'interior de l'utero materno, asinas como os importants cambios fisiolochicos, metabolicos y morfolochicos que se producen en a muller ta protecher, nutrir y permitir o desembolique d'o feto, como a interrupción d'os ciclos menstruals, u l'aumento d'a mida d'as mamas ta preparar a lactancia.
Tienen emprenyadura toz os mamiferos y, por tanto tamién os sers humans. En a especie humana as chestacions gosan estar unicas, encara que pueden producir-se emprenyaduras moltiples. L'aplicación de tecnicas de reproducción asistita ye fendo puyar a incidencia d'emprenyaduras moltiples en os países desembolicatos.[3] O sexo d'o nuevo individuo viene determinato por una combinación chenetica d'a parella de cromosomas sexuals, seguntes cual sía la copia transmesa a lo espermatozoide mientres a meiosi.
A emprenyadura humana gosa durar nueu meses u bellas 40 semanas dende o primer día d'a zaguera menstruación; u 38 dende a fecundación (alto u baixo bels 9 meses). Se considera que a chestación u emprenyadura prencipia chusto dimpués d'a fecundación de l'ovulo y a implantación de l'embrión y a matriz. O primer trimestre ye l'inte de mayor riesgo d'alborto espontanio; o prencipio d'o tercer trimestre se considera o punto de viabilidat d'o feto, ixe punto dende o cual puet sobrevivir difuera de l'utero sin de refirme medico. L'alborto ye a inturrupción d'a emprenyadura, en o lapso que va dende a concepción dica o prencipio d'o naiximiento, bien sía de traza voluntaria u por causas naturals u de malautía. Se diz microalborto a lo impedimento d'o desembolique d'o preembrión humán y a suya consecuent muerte.
Denominacions
[editar | modificar o codigo]
En aragonés medieval se documenta l'uso d'o verbo prenyar aplicau tanto a fembras humanas como de cualsiquier especie de mamifero viviparo. Se documenta o verbo emprenyar en casos de pronominalización de l'obchecto directo. No se documenta usos medievals d'o verbo emb(a)razar ni d'o substantivo verbal rizotonico emb(a)razo, que son lusismos u leyonesismos[4] presents en atras luengas latinas.
En benasqués se distingue entre embarazo (pronunciau /embaraso/ con seseyo) y prenyau: embarazo se diz en relación a mullers y prenyau se diz en relación a las fembras d'atras especies[2] de mamiferos viviparos de manera que la muller puet estar embarazada (pronunciau /embarasada/) y la craba prenyada.
Esta distinción entre embarazada referiu a la muller y prenyada referiu a las fembras en cheneral ye confirmada pa l'aragonés baixo-ribagorzano por María Luisa Arnal Purroy[5].
L'ALEANR no incluyó en as suyas enquestas preguntas sobre o substantivo derivau de embarazar u prenyar, pero sí o participio derivau d'este verbo como respuesta a la pregunta ¿ cómo está la mujer que espera un hijo ?. Por o que fa a l'Alto Aragón as respuestas son prenyada y embarazada, a segunda con diferents variants.
O substantivo verbal rizotonico embarazo se documenta en parlas alto-aragonesas tan a l'ueste como o cheso[6] y presenta a variant embrazo en parlas como o chistabín[7] y l'aragonés de Sierra Ferrera[8].
A parola prenyau se documenta en Os Monegros[9], sin especificar diferencia con o embarazo d'as mullers (pero citando manimenos a parola embrazada como part d'o lexico monegrín).
Notas
[editar | modificar o codigo]- ↑ Con a variant emprenyatura
- ↑ Con as variants emprenyau, prenyato, prinyau, prenye y prenyo
- ↑ Con a variant embrazo
Referencias
[editar | modificar o codigo]- ↑ 1,0 1,1 1,2 1,3 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ 2,0 2,1 2,2 2,3 (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 132, p 399.
- ↑ A incidencia d'emprenyaduras moltiples en a población cheneral ye d'un 1,5%. En tecnicas de fecundación asistita puet gosar estar 20%. Luis E. Tsng; Juan F. Mere. Ginecología y Obstetricia. Vol. 42, núm. 3, aviento de 1996
- ↑ (es) Ivonne Bordelois: A la escucha del cuerpo/ Listening to the body: Puentes Entre La Salud Y Las Palabras. Libros del Zorzal. p 38.
- ↑ (es) María Luisa Arnal Purroy: Diccionario del habla de la Baja Ribagorza Occidental, Gara d'Edizions, 2003. p 124.
- ↑ (an) Chusé Lera Alsina Aplego. Diccionario de Resistencia y Gramática sobre lo cheso. Massanas gràfiques. 2004, p 91.
- ↑ (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano, Gara d'Edizions. Zaragoza, 2008. ISBN978-84-8094-061-0 p 218.
- ↑ (es) Blas Gabarda, F. y Romanos Hernando, F.; El aragonés de Baixo Penyas. 2005, Gara d'Edizions, p 83.
- ↑ (an) Francho Rodés, Paquita Maza y Gonzalo Gavín: Bocabulario Monegrino, 2005. Publicacions d'o Consello d'a Fabla Aragonesa, p 148.
Vinclos externos
[editar | modificar o codigo]
Se veigan as imáchens de Commons sobre a emprenyadura.
| Control d'autoridaz |
|
|---|
Datos: Q11995- Multimedia: Human pregnancy / Q11995