Emirato de Cordoba

De Biquipedia
Ir ta: navego, busca
إمارة قرطبة
Imārat Qurṭuba

Emirato de Cordoba
3by2white.svg 756 — 929 3by2white.svg
3by2white.svg
Situación de Emirato de Cordoba
División administrativa en coras, en os zaguers anyos
Capital Cordoba
Idioma oficial Arabe
Relichión Musulmana
Gubierno Monarquía
Emir
 • 756-788
 • 912-929

Abderramán I
Abderramán III
Periodo historico Edat Meya
 • Establimiento 756
 • Desaparición 929

O Emirato de Cordoba estió un estato islamico estendillato por a mayor parte d'a Peninsula Iberica u una etapa historica d'Al-Andalus con gobernants por a dinastía Omeya con títol d'Emir.

Historia[editar | editar código]

O principe Abderramán consiguió escapar d'a persecución abbasí y se refuchió en Marruecos conseguindo-ie o refirme d'os yemenís, enemigos de Yusuf al-Fihrí, o gobernador de l'Al Andalus. Dimpués en 755 pasó ta l'Al Andalus y desembarcó en Almuñecar. En l'Al Andalus trobó o refirme d'os sirians que heban plegato pa esclafar a segunda revuelta berber, (un exercito d'uns 7.000 dirichitos por Balch). Fue proclamato emir de l'Al Andalus en 756 en Archidona y consiguió a primera victoria contra Yusuf al-Fihrí entrando trunfador en Cordoba, encomenzando a etapa d'o emirato independient de Cordoba.

O primer emir tenió muitas dificultatz:

  • a resistencia de Yusuf y os suyos fillos.
  • a resistencia d'o caudiello d'os sirians de Chaén al-Sumayl.
  • Aparición de partidarios d'os abbasidas en bells puntos.
  • Sublevación d'os antigos aliatos yemenís.
  • A famosa expedición de Carlos Magno ta Zaragoza con a derrota de Roncesvals.

Abderramán estructuró o exercito, creyó nuevos servicios administrativos y encomenzó a construcción d'a Mezquita de Cordoba sobre l'antiga ilesia de Sant Vicent.

O segundo Emir, Hixam I fue proclamato quan morió o suyo padre y de fueras d'a guerra civil contra os partidarios d'o suyo chirmán estió un emirato tranquilo. O tercer emir habió de luitar contra revueltas en Cordoba y Toledo. Os rebels de l'Arrabal de Cordoba fuoron forachitatos ta Fez y Creta. Retaculó debant d'os cristians: os francos ocuporon Barcelona y o reino astur ocupó Lisbona.

Abderramán II habió de luitar contra sublevacions en Toledo y Merida refirmatas por reis cristians. Alavez os vikingos almochuces entroron por o Guadalquivir y saqueyoron Sevilla. Abderramán ordenó a construcción d'atarazanas pa evitar atra incursión. Bi habió tensions relichiosas entre musulmans y mozarabes y un parroco dito prefecto fue escabezato. Abderramán prebó de solucionar-lo con un concilio de bispes en Cordoba presiditos por o metropolitán de Sevilla que desaprobó l'actitut d'os martirs espontanios.

O Emir Mamad I, a l'egual que os suyos sucesors al-Mundir y Abd Allah tenioron grants problemas internos. Os toledans, refirmatos por Ordoño I de Leyón luitaban con exito contra o exercito cordobés, y habioron de negociar con ellos. Ibn Marwan, aduyato por Alifonso III se fació fuerte en Extremadura. En Bobastro Umar Hafsun encabezó un movimiento nacionalista que no dixaba tartir a las autoridatz cordobesas. A vegatas no gobernaban que a capital. A la muerte d'Abd Alla a situación yera muito caótica.

Abderramán III consiguió eliminar os focos de rebelión y dica luitó contra os fatimís en o norte d'Africa y en 929 prenió o títol de califa.

Institucions[editar | editar código]

O cabo supremo d'o estato yera o sobirán, a qui deciban emir al muslimin, emir al mi’minin u soldán. Considerato como cabo espiritual y temporal, a suya autoridat yera absoluta. Podeba, manimenos, delegar belunas d'as suyas funcions en atras presonas, susceptibles d'estar depuestas en qualsiquier inte por o sobirán. Yera cheneral d'os exercitos y dirichiba a politica exterior. Administraba os gastos publicos, presidiba a oración d'os viernes en a mezquita y recibiba o churamiento de fidelidat d'os suyos subditos en o inte de plegar a la cadiera reyal. Teneba como símbolo o aniello d'oro con a suya divisa personal.

O cargo de mayor importancia dimpués d'o emir yera o de hachib (primer menistro), que yera encargato de dirichir l'administración d'o palacio, a cancillería y a hicienda. O poder d'o Hachib bellas vegatas yera o d'un verdadero sobirán, como en os tiempos d'o califato se desvinió con Almanzor.

O wazir (visir u ministro) s'ocupaba de l'armamento, exercito, caballería, manufacturas reyals, comunicacions y secretaría.

As principals fuents d'ingreso yeran a ganima (botín), a chizya (tributo personal) y o kharach (impuesto sobre a propiedat). Bi heba atros impuestos, consideratos ilegals, sobre o bestiar, os mercatos, etz...

O qadí (chuez) por delegación d'o sobirán aplicaba a lei d'alcuerdo con l'Alcorán. As suyas prerrogativas fuoron puyando: primero resolveba problemas de reparto de botins, herencios, esvurcios, castigos, dimpués tamién s'encargaba d'afers administrativos. Entre os funcionarios dependients d'o qadí yera l'almotazén u zabazequia encargato d'aguaitar y castigars os fraus en pesas y midas, velar por a buena calidat d'os productos y a honradeza d'os vendedors.

En o exercito bi heba soldatos d'oficio, mercenarios y voluntarios. Os soldatos d'oficio yeran os sirians. Dimpués d'o desembarco d'os vikingos organizoron una marina.