Descubrimiento d'America

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Colón plega a America

O termin descubrimiento d'America s'emplega ta referir-se a la primera plegata documentata d'europeus a America con grans consecuencias historicas. No estió a primera plegata d'europeus, porque bi ha indicias que os vikingos plegoron a l'actual Canadá y probablement a los actuals Estaus Unius en o sieglo XI (de feito, s'atribuye a Erik o Royo lo descubrimiento de Vinland, un 9 d'octubre de l'anyo 1000, estando lo primer europeu en pisar America); manimenos, a suya vesita no habió efectos importants en a historia posterior d'o continent. Por as razons anteriors, se diz descubrimiento d'America a la plegata d'espanyols comandatos por Cristofo Colombo a una isla d'o mar Caribe. Ta os indichenas americanos no estió un descubrimiento sino lo prencipio d'una invasión.

Colombo intentaba viachar ta las Indias por una nueva rota enta l'ueste, que le levará a trobar-se con America o 12 d'octubre de 1492. A lo prencipio creyeba haber plegato a un archipelago d'a India en cuentas d'haber descubierto un nuevo continent. Amerigo Vespucci publicó Novus Mundus, en 1504, estando lo primero en explicar ubiertament que se trataba d'un nuevo mundo. A publicación tenió un gran exito en Europa. O cartografo Waldseemueller se precepitó acreditando-lo como lo descubridor d'un continent y metió lo nombre d'America a partir d'Amerigo. En edicions posteriors d'a suya Cosmografía, Waldseemueller cambeó d'opinión, pero lo nombre ya heba feito fortuna.

Cal parar cuenta que o concepto de descubrimiento d'America nomás tien sentito dende una perspectiva eurocentrica, ya que o continent americano yera habitato dende feba milenios (unos 30, alto u baixo). Antimás, como s'ha dito muitas vegatas, bi ha evidencia historica que navegants vikingos ya heban plegato a America en a Edat Meya. De totas trazas, o viache de Colombo establió un vinclo definitivo entre Europa y America, que suposó a colonización d'o Nuevo mundo por parti d'as potencias europeas en os sieglos siguients.