Día cenisa

Mosén fendo una cruz de cenisa en a frent d'una mesacha

O Día cenisa (d'o latín dies cinerum) ye o primer día d'a Cuaresma en os calendarios liturchicos catolico y anglicano, asinas como en os d'as diversas denominacions protestants (luterana, metodista, presbiteriana y cualques denominacions baptistas). Se celebra cuaranta y seis días antis d'o Dominche de Pascua. Iste día puet variar anyalment seguntes como se celebre a Pascua, que ha de coincidir con o primer dominche dimpués d'a primera luna plena de primavera. Por tanto, o día cenisa puet oscilar entre o 4 de febrero y o 10 de marzo.

A Cuaresma, un costumbre que se fixó en o sieglo IV, son os cuaranta días d'antis d'a Pascua, tot reflectando-se en os cuaranta días que Chesús pasó en o disierto, a on plegó a fer-le tentaduras o Diaple. En os sieglos VI y VII l'achuno fue adquirindo importancia como practica cuaresmal. Como o dominche se commemora a resurrección de Cristo y, por tanto, no ye practica habitual fer-ie achuno, os cristians nomás en feban de luns a sabado (seis días) y a o largo de seis semanas, asinas como de miercres a sabado mientres a semana precedent, de manera que se cubriba o periodo de cuaranta días. Ixo fació que l'inicio d'a Cuaresma s'avanzase a o miercres previo a o primer sabado d'o periodo.