Cultura d'os campos d'urnas

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Un mapa simplicau, enta 1200 BC, amostrando la cultura de los campos d'urnas central (en royo), la cultura de los campos d'urnas de lo norte (narancha), la cultura de Knoviz (azul-griso), la cultura de Lusacia (porpra), la cultura danubiana (marrón), la cultura de Terramara (azul), o bronce atlantico (verde), y la cultura de lo bronce nordico (amariello).

La cultura de los campos d'urnas (1300 aC-750 aC) estió una cultura tardana de la Edat de Bronce de Centroeuropa que s'estendilló dica Europa occidental, incluindo la val d'Ebro. Prene nombre de lo costumbre de cremar los muertos y meter as suyas cenisas en urnas, que se apedecan en un campo. La cultura de los campos d'urnas ye chusto dimpués de la cultura de los Tumulos centroeuropea y chusto antes de la cultura de Hallstätt, que ye ya de la primera Edat de Fierro.

Cronolochía[editar | modificar o codigo]

Se crei que en bella zona, como lo sudueste d'Alemanya ya i heba Campos d'Urnas arredol l'anyo 1200 aC (principio de l'Hallstätt A), pero la fase D de lo Bronce de Riegsee ya contién cremacions. Bi ha cuestions pendients porque en ixas zonas de Centroeuropa lo cambeo dende lo Bronce meyo ta la cultura de los campos d'urnas ye una transición progresiva. La cultura de los campos d'urnas abarca las fases Hallstätt A e B (Ha A u B) en lo sistema cronolochico de Paul Reinecke, pero no s'ha de confundir con la cultura de Hallstätt (Ha C e D) de la vinient Edat de Fierro. Esto corresponde a las fases Montelius III-IV de la Edat de Bronce de lo Norte. Si la fase Bronce D de la cronolochía de Reinecke se incluye u no, depende de l'autor y rechión.

La cultura de los campos d'urnas se divide en cualques subfases (basau en Müller-Karpe sen.):

Anyo antes Cristo
Bz D1300-1200
Ha A11200-1100
Ha A21100-1000
Ha B11000-800
Ha B2900-800
Ha B3800-750

Orichen[editar | modificar o codigo]

La cultura de los campos d'urnas se desembolicó dende la cultura de los Tumulos precedent. La transición ye gradual en ceramica como en los ritos funerarios. En bella zona d'Alemanya la cremación y inhumación existioron simultaniament (facies Wölfersheim). Bella tumba tiene una combinación de ceramica de la cultura de los Tumulos y espatas de la cultura de los campos d'urnas (Kressborn, Bodenseekreis) u ceramica incisa de la cultura de los Tumulos chunto con los primeros tipos de ceramica de los campos d'urnas (Mengen). En lo Norte prenioron la cultura de los campos d'urnas només que en lo periodo HaA2.

En una paúl de Ellmoosen (Kr. Bad Aibling, Alemanya) bi ha una representación de tot l'intervalo temporal dende lo Bronce B dica lo periodo temprano de la cultura de los campos d'urnas (Ha A). Esto demuestra una continación considerable de lo ritual. En la Loira, Sena y lo Roine, bel vado contiene depositos que van dende lo neolitico tardano enta lo periodo de los campos d'urnas.

Los orichens de lo ritual de cremación se crei que son en los Balcans, a on ye amplament estendillau en la zona este de la cultura de los Tumulos. Se principia a veyer bella cremación en la cultura Proto-Lusaciana y en a cultura de Trzciniec

Distribución y grupos locals[editar | modificar o codigo]

La cultura d'os Campos d'Urnas yera en una gran aria dende l'ueste d'Hongría dica l'este de Francia y dende los Alpes dica a man de la Mar de lo Norte. Los grupos locals, prencipalment diferenciaus por la ceramica, son:

  • Cultura de Knovíz, en l'ueste y norte de Bohemia, sud de Turinchia ye nord-este de Bavera.
  • Cultura de Milavce, en lo sudeste de Bohemia.
  • Grupo de Velatice-Baierdorf, en Moravia y Austria.
  • Grupo de Čaka, en l'ueste d'Eslovaquia.
  • Grupo de lo nord-este de Bavera, dividiu en grupo de baixa Bavera y grupo de l'Alto Palatinato.
  • Grupo de Unstrut en Turinchia, una mezcla entre la cultura de Knovíz y la cultura de campos d'urnas de lo sud d'Alemanya.
  • Cultura de los campos d'urnas de lo Sud d'Alemanya
  • Campos d'urnas de lo Baixo Rin.
    • Grupo de lo baixo Hesse.
    • Grupo de Westphalia y Norte de los Países Baixos.
    • Grupo de lo norueste en l'aria de lo delta que bi ha en los Países Baixos.

A vegadas la distribución d'artefactos que perteneixe a estos grupos amuestra mugas claras, podendo indicar esto bella estructura politica como tribus. Los obchectos de metal son mas estendillaus y la suya distribución no conoix las mesmas mugas que la ceramica. Poderba haber esdeveniu que existisen tallers d'artesans especializaus que treballaban pa las elites socials en unas arias mes amplas.

Lugars y trazas d'apedecar los muertos[editar | modificar o codigo]

En lo periodo de los Tumulos yeran comuns las inhumacions multiples baixo los ditos tumulos, a lo menos pa los livels baixos de la sociedat. En lo periodo de los campos d'urnas predomina la inhumación y l'apedecamiento en tumbas individuals, encara que bi ha bel tumulo.

En las fases tempranas de lo periodo de los campos d'urnas escababan tumbas con forma d'hombre u antropomorfas, a vegadas con un suelo de losas. N'ixas tumbas estendillaban as cenisas de lo muerto. Dimpués d'este periodo predominó apedecar las cenisas en urnas. Bel autor especula que esta traza d'apedecar puet indicar un important cambio en las creyencias relichiosas u mitos sobre la vida dimpués de la muerte.

La mida de los campos on apedecaban las urnas y han dau nombre a esta cultura ye variable. En Bavera pueden contener mils d'apedecamientos, mientres que lo fosal de mes gran de Baden-Württemberg, en Dautmergen, no tien que 30 tumbas.

Posaban a los muertos en una pira con ofrendas de minchar y las alfachas personals. Las restos de uesos son mes abundans que en la epoca romana, lo que indica que s'emplegaba menos fusta pa cremar.

Muitos campos d'urnas los albandonoron en lo cabo de la Edat de Bronce. En Centroeuropa, nomás que los campos d'urnas de lo Baixo Rin encara s'emplegaban en la Edat de Fierro temprana (Ha C, a vegadas mesmo D).

En la val d'Ebro, los campos d'urnas encara teneban actividat en la I Edat de Fierro.

Se veiga tamién[editar | modificar o codigo]