Cortz de Monzón-Tamarit de Litera-Fraga (1383-1384)
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Plantilla:Ficha de Corz As Corz de Monzón-Tamarit de Litera-Fraga de 1383-1384 estioron unas Corz Chenerals d'Aragón que fuoron convocadas por Pero IV d'Aragón, estando en Alzira, o día 2 de chulio de 1382, pa celebrar-se o 30 de setiembre en Monzón u en Gandesa, seguntes a voluntat reyal. Quan o rei se decidió por Gandesa, os aragonesos s'oponioron, y o 24 d'abril de 1383, dende Tortosa, torna a convocar Corz en Monzón pa o 15 de mayo, y posposadas quantas vegadas, fuoron inauguradas solemnement o 12 de chunio en a sala mayor d'o castiello de Monzón, con a proposición a o parlamento d'o rei. O 20 de febrero de 1384 as Corz, por un brot de peste, prencipiaban as sesions en Tamarit de Litera; y por o mesmo motivo, se mueven ta Fraga, a on prencipian as sesions o 28 de mayo, y rematan o 4 de chulio de 1384, zaguera sesión conoixida, prolargando-se posteriorment pero sin tornar-se a convocar nunca más.[1][2][3][4]
Istas Corz las convoca o rei pa aconseguir d'os representants d'os suyos estaus un donativo que le permita mantener o esfuerzo belico en a isla de Cerdenya; os representants estamentals compareixen con un important agreviamiento, una acusación de lesa machestat contra quantos consellers d'o rei y de l'infant Chuan, y a inculpación de quantos oficials reyals por corrupción.[5]
En istas Corz, os representants d'os distintos territoris compareixen conchuntament en a mayor parti d'as sesions. Y en as negociacions más importants, a concesión d'o donativo y as denuncias d'as Corts contra os consellers y oficials reyals, encara que se nombran representants de cadagún d'os brazos de cada territorio, a negociación tamién se fa de forma conchunta.[6]
Corz d'Aragón[editar | modificar o codigo]
En a zaguera convocatoria d'as Corz, o 24 d'abril de 1383, se requiere a presencia de 19 miembros d'o brazo eclesiastico (o rechent de l'arcebispe de Zaragoza, por estar en seu vacant, os bispes de Uesca, Tarazona, y Segorb-Albarrazín, os comendadors de Mont Albán y Alcanyiz, o castellano d'Amposta, os abatz de Rueda, Mont Aragón, Sant Veturián, Piedra, Sant Chuan d'a Penya, Veruela y Fuents Claras, o prior de Santa Cristina, y os priors y capítols d'as seus de Zaragoza, Segorb-Albarrazín, Tarazona y Uesca); 15 miembros de l'alta nobleza; 23 d'a chicota nobleza; y representants de 24 ciudatz, villas y comunidatz d'aldeyas reyals (as ciudatz de Zaragoza, Tarazona, Balbastro, Uesca, Albarrazín, Teruel, Daroca, Chaca y Calatayú, as villas d'Uncastiello, Taust, Sos, Almudévar, Exeya, Sadaba, Zuera, Mont Albán, Alcanyiz, L'Aínsa, Monzón y Tamarit de Litera, y as comunidatz d'aldeyas de Calatayú, Daroca y Teruel).[7]
En istas Corz no s'apreba dengún fuero ni dengún acto de Cort.[3][8]
Referencias[editar | modificar o codigo]
- ↑ Baiges i Jardí 1992: pp. XIII-XIV.
- ↑ Zurita 1610: fol. 381r.
- ↑ 3,0 3,1 Montesa 1862: pp. 142-144.
- ↑ Real Academia de la Historia 1853: pp. 110-111.
- ↑ Baiges i Jardí 1992: p. XIV.
- ↑ Baiges i Jardí 1992: pp. 73-285.
- ↑ Baiges i Jardí 1992: pp. 31-35.
- ↑ En as recopilacions de 1496 y 1866 d'os fueros no apareixe denguna disposición legal y, por tanto, no se fa denguna mención a istas Corz. (Fori regni Aragonum 1496. Savall y Dronda 1866: pp. XVII-XVIII).
Vinclos externos[editar | modificar o codigo]
| Predecesor: Corz de Monzón (1376) |
Corz Chenerals d'Aragón Corz de Monzón-Tamarit-Fraga (1383-1384) |
Succesor: Corz de Monzón (1388-1389) |
| Predecesor: Corz de Zaragoza (1381) |
Corz d'o Reino d'Aragón Corz de Monzón-Tamarit-Fraga (1383-1384) |
Succesor: Corz de Monzón (1388-1389) |
| Predecesor: Corz de Barcelona (1379) |
Corz Catalanas Corz de Monzón-Tamarit-Fraga (1383-1384) |
Succesor: Corz de Monzón (1388-1389) |
| Predecesor: Corz de Monzón (1376) |
Corz d'o Reino de Valencia Corz de Monzón-Tamarit-Fraga (1383-1384) |
Succesor: Corz de Monzón (1388-1389) |