Cortina

Cortina penchada d'una barra.

Una cortina u postalera ye una pieza de tela, u un atro material destinada a bloqueyar u enfoscar a luz, as corrients d'aire u l'augua, en o caso d'una cortina de ducha. Una cortina tamién ye a pantalla u telón móbil d'un teatro que desepara o escenario de l'auditorio u que sirve como telón de fundo.

A sobén se penchan cortinas en l'interior d'as finestras d'un edificio pa bloqueyar o paso d'a luz. Por eixemplo, de nueits pa aduyar a dormir, u pa privar que a luz s'eslampe difuera de l'edificio empachando que a chent de difuera pueda veyer l'interior, a sobén por motivos de privacidat. As cortinas tienen diversas formas, materials, midas, colors y patrons. A sobén tienen as suyas propias seccions en os grans almagacens, mientres que bellas botigas s'adedican exclusivament a vender cortinas.

As cortinas varian seguntes a tolerancia a o paso d'a luz, o deterioro d'a luz ultravioleta, a retención d'o polvo, l'absorción d'o rudio, a resistencia a o fuego y a vida útil. As cortinas se pueden accionar a man, con cordons, con botons u con ordinadors controlaus a distancia. As midas d'una cortina pa una finestra varian muito seguntes o tipo de cortina, a mida d'a finestra y o tipo y o peso d'a cortina. As cortinas luengas que cayen dica o solero se dicen veleras.

As cortinas son una forma de decorar as finestras y completan l'aspecto cheneral de l'interior d'a casa. As cortinas aduyan a controlar l'ambient y o fluxo de luz natural en a cambra. L'efecto d'as cortinas se veye millor a la luz d'o día y, con un posicionamiento adecuau d'a luz interior, pueden favoreixer a decoración mesmo de nueits.

Referencias

• Datos: Q445294