Conglomerau
Un conglomerau[1][nota 1] ye una roca sedimentaria detritica formada por ruellos de glera u cantals unius por un cemento de precipitación quimica y a vegadas una matriz.
Se considera conglomerau cuan os fragmentos de roca son mayors de 2 mm, mayors que los de l'arena.
Un ambient tipico de sedimentación d'os conglomeraus son os ríos, quedando a man de l'antigo cauz por fer falta mes enerchía pa mover os ruellos que l'arena, o limo u l'archila.
Os conglomeraus con cantals angulosos han sedimentau en ambients continentals de semontano por l'acción de torrents.
En a depresión d'Ebro ha estau tipica a sedimentación en as marguins de cuenca de ruellos de glera y cantals traitos por ríos dende os Pireneus, Sistema Iberico y as Catalanides. Os conglomeraus que n'han resultau s'han cementau con carbonato calcico, y han desarrollau un modelau en mallos por a disolución d'este carbonato a favor de diaclasas verticals. Esto se vei en os Mallos de Riglos, Mallos d'Agüero, sierra de Santo Domingo, Los Fayos, La Pesquera (Beceit) y Roques del Masmut (Penyarroya).
En a compleganza d'o río Martín se reculle a denominación de piedra de haba,[2] que puet estar un leyonesismo introduciu por os meners asturianos y leyoneses que conoixerían a denominación de piedra de faba en astur-leyonés.
Notas
[editar | modificar o codigo]- ↑ Con a variant conglomerato
Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ (es) Luis Miguel Bajén García, Fernando Gabarrús Alquézar: Memoria de los hombres-libro. Guía de la Cultura Popular del Río Martín. Biella Nuei Sociedad Cooperativa, 2002. pp 61-62
| Control d'autoridaz |
|
|---|
Datos: Q191704
Multimedia: Conglomerate / Q191704