Confraría relichiosa
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Las confrarías, conflairías u cofadrías relichiosas son collas de laicos pa promover una creyencia. Las confrarías relichiosas las diriche un gran mayestre, un mayordombre, un santo u un gurú, y pueden estar:
- Confraría musulmana. Han estendillau a sobén bella noción preislamica u cristiana en lo Islam, como por eixemplo l'amor mistica de Dios u lo culto a los santos. Cualques escuelas de sufís se dicen confrarías, como por eixemplo los derbixes.
- Confraría catolica. Una confraría ye una asociación de creyents catolicos que fan rolde arredol d'una advocación de Cristo, la Virchen u un santo, un inte de la pasión u una reliquia. Bi n'ha tres tipos:
- Confrarías penitencials, que salen en Semana Santa. Son talment las mes conoixidas en lo Baixo Aragón.
- Confrarías de Gloria, que salen la resta de l'anyo.
- Confrarías sacramentals, que tienen como titular a lo Santismo Sacramento.
Totas las confrarías gosan organizar una procesión, a lo menos una vegada en una anyada, solas u con atras confrarías.
L'organo plenario de la confraría ye lo capítol u asamblea cheneral de toz los conflaires. Lo capítol cheneral s'encarga d'esleyir a la chunta, que ye l'organo de gubierno de la confraría, con un president.
Cualques confrarías tamién pueden aplegar-se en un organo superior que prene diferents nombres seguntes lo puesto: Consello cheneral, Capítol de Confrarías, Capítol superior, Federación, Agrupación, Unión, Chunta Local...
En las confrarías bi ha cualques clases de miembros, como los mayordombres, estants, costalers, hombres de cadiera reyal, cargadors, ecetra...
En principio cualsiquier cristiano puet fer parte d'una confraría, conseguindo la firma de bel chirmán que lo avale. Los nuevos miembros gosan recibir la investidura de la tunica y la imposición d'escapulario u medalla.
Una confraría important en la baixa Edat Meya zaragozana estió la Ermandat et Confrayría in honore de Sancte Marie de Transfixio (1311-1508), que escribió los suyos estatutos en aragonés. Un atra confraría baixomedieval que se'n conoixen los suyos estatutos en aragonés ye la de Confrairía de Santiago en Tudela, fundada en 1355 con l'aprobación de Carlos de Navarra.
La tradición de confrarías catolicas baixomedievals s'estendilló en las zonas d'America controladas por Castiella y Portugal, y i estioron un elemento importantismo de la vida. En Brasil los negros formoron confrarías d'esclavos d'orichen africano, y asinas empecipió un sincretismo relichioso entre lo catolicismo y los cultos africanos, desembocando en los cultos afrocaribenyos como lo Candomblé.