Colata de lava

De Biquipedia
Ir a la navegación Ir a la búsqueda
Anvista aeria de coladas de lava en as costeras d'o Kīlauea en Hawaï en 2005.

Una colata de lava u colata volcanica ye una formación volcanica formada por un regallo de lava que sale d'un volcán u d'una erupción fisural. O termin designa tanto a la lava fluida en movimiento como a la lava solidificada dimpués de baixar a suya temperatura y encara identificable en relación a los atros elementos d'a redolada.

As coladas producen estropicios u desferras en os cautivos, incendios, tallos en as linias de comunicación, sozterran os fondons d'as vals y pueden producir inundacions si s'entiba l'augua.

A periglosidat d'as coladas de lava depende d'a suya viscosidat, y bi ha gran diferencia entre as lavas basicas y as lavas acidas. Un volcán puet emitir diferents clases de lava dependendo d'a suya evolución.

As lavas provinients de magmas basicos son muito fluidas pero presentan poca periglosidat porque as erupcions que las abocan dende os cráters enta baixo son poco violentas por liberar os gases con regularidat. D'esta traza recorren grans distancias ocupando os fondons d'as vals y os cabaixos que pueden ser evaquaus.

As lavas provinients de magmas acidos son poco fluidas porque o suyo continiu en silica li da gran viscosidat. D'esta traza se desplazan amonico y no recorren grans distancias. Manimenos son muito mes periglosas que as lavas basicas porque a suya viscosidat lis impide de liberar os gases con regularidat y se liberan de sopetón producindo grans explosions. En estas grans explosions a lava s'esminglana, os trozos son forachitaus a l'aire y cayen en a redolada d'o volcán en forma de piroclastos.

Os estratovulcans son formaus por alternancia de coladas volcanicas y libels de piroclastos, por un regulars de composición andesitica as unas y os atros.[1]

Referencias[editar | editar código]

  1. (es) Francisco Anguita Virella, Fernando Moreno Serrano: Procesos Geológicos Internos. Editorial Rueda. Madrit 1991.

Bibliografía[editar | editar código]