Charles de Gaulle

De Biquipedia
Ir a la navegación Ir a la búsqueda
Articlo d'os 1000
Charles de Gaulle
Charles de Gaulle

O cheneral Charles de Gaulle, president de Francia


8 de chinero de 1959 – 28 d'abril de 1969
Primer menistro   Maurice Couve de Murville (1968-1969)
Georges Pompidou (1962-1968)
Michel Debré (1959-1961)
Precedito por René Coty
Succedito por Alain Poher (interino)
Georges Pompidou


Menistro d'Esfensa
1 de chunio de 1958 – 8 de chinero de 1959
President René Coty
Primer menistro   Charles de Gaulle
Precedito por Pierre de Chevigné
Succedito por Pierre Guillaumat

1 de chunio de 1958 – 8 de chinero de 1959
President René Coty
Precedito por Pierre Pflimlin
Succedito por Michel Debré

President d'o Gubierno Provisional d'a Republica Francesa
3 de chulio de 1944 – 20 de chinero de 1946
Precedito por Félix Gouin

Líder d'as Fuerzas Armatas d'a Francia Libre
18 de chunio de 1940 – 3 de chulio de 1944
Precedito por Tercera Republica Francesa
Succedito por Gubierno Provisional d'a Republica Francesa
Naiximiento 22 de noviembre de 1890
Flag of France.svg Lille, Francia
Muerte 9 de noviembre de 1970
Colombey-les-Deux-Églises, Francia
Partito Unión de Democratas por a Republica
Conchuche Yvonne de Gaulle
Profesión Melitar
Relichión Catolico
Sinyal Signature degaulle.png

Charles de Gaulle, naixito d'a ciudat de Lille (Norte, Norte-Paso de Calais) o 22 de noviembre de 1890 y muerto o 9 de noviembre de 1970 en Colombey-les-Deux-Églises (Alto Marne), estió un melitar con rango de cheneral y un politico francés, qui estió President d'a Republica Francesa dende o 8 de chinero de 1959 dica o 28 d'abril de 1969.

Mientres a Segunda Guerra Mundial estió o chefe d'una división blindata y dimpués d'a redota d'os Aliatos en a batalla de Francia y a proclamación d'a Francia de Vichy, esdevenió o chefe d'a Francia Libre, dende o suyo exilio en Londres, liderando a Resistencia francesa contra o Tercer Reich y continando a luita chunto a los Aliatos. Antiparte, antis d'a guerra ya heba estato uno d'os teoricos d'o emplego d'o tanque en os mudernos campos de batalla aduyato por l'aviación melitar, encara que, ironicament, as suyas teorías no fuoron desembolicatas por os Aliatos occidentals sino por a Wehrmacht d'o Tercer Reich en a dita blitzkrieg.

En rematar a Segunda Guerra Mundial, de Gaulle estió chefe d'o Gubierno provisional dica la proclamación d'a IV Republica Francesa, estando-ne uno d'os suyos prencipals líders politicos, encara que estió en 1958 o establidor d'a V Republica Francesa.

Os suyos orichens familiars y os suyos estudeos[editar | editar código]

O casa natal de Charles de Gaulle en Lille.

Charles de Gaulle yera naixito en una familia de tradición catolica a on a suya rama paterna (os de Gaulle) deciban estar descendients d'a chichota nobleza francesa, encara que os de Gaulle no amaneixen en garra repertorio u nobiliario, y que viviban en París dende meyatos d'o sieglo XVIII. A suya rama materna yera d'a rechión de Norte-Paso de Calais, estando o suyo güelo un industrial de Lille, a on nació Charles de Gaulle o 22 de noviembre de 1890.

O pai de Charles yera Henri de Gaulle, un profesor, y a suya mai Jeanne Maillot, y teneba tres chirmans y una chirmana. Encara que yeran catolicos, a suya familia yera de tradición liberal, vinclata a la III Republica Francesa y a las suyas institucions y de tradición dreyfusard. Charles de Gaulle recibió amostranza en escuelas vinclatas a la Ilesia Catolica, dica que en 1905, quan a crisi entre a Ilesia Catolica y as institucions civils d'o Estato, marchó ta Belchica ta continar estudeando en establecimientos relichiosos d'ixe país.

En 1908, Charles de Gaulle dentró en a Escuela Especial Melitar de Saint-Cyr, a on recibió a suya diplomatura como melitar en 1912, estando destinato a Infantería, en o 33º Rechimiento d'Infantería, que teneba os suyos cuartels en a ciudat d'Arras, en o Paso de Calais, un rechimiento mandato por Philippe Pétain, que en ixe inte yera coronel.

Primera Guerra Mundial[editar | editar código]

Os repuis d'o fuerte de Douaumont en l'actualidat.

En prencipiar a Primera Guerra Mundial, Charles de Gaulle yera tinent, y puyó a o ran de capitán en chinero de 1915.[1] Ya heba recibito una ferita de guerra en o chenullo mientres a suya primera acción de guerra, en Dinant, o 15 d'agosto de 1914, y recibió a suya segunda ferita de guerra en a man cucha o 10 de marzo de 1915, mientres a batalla d'o Somme, quan ya s'heba encorporato a un nuevo destín en o 33º Rechimiento d'Infantería, en a rechión de Campanya-Ardenas.

O 2 de marzo de 1916 o suyo rechimiento fue destruito por os alemans mientres esfendeba o fuerte de Douaumont, en Douaumont, a man d'a fortificación francesa de Verdun, mientres a batalla de Verdun. Ferito por os alemans a la bayoneta en a garra cucha, cayó prisionero de guerra d'as tropas d'o Exercito alemán. En mirar d'eslampar, os alemans lo ninvioron a un puesto más seguro.

Asinas, fue ninviato a un campo de prisioners de guerra en Ingolstadt (Bavera), a on os alemans ninviaban os oficials que heban prebato de fuyir. En ixe campo yeran tamién o futuro cheneral Georges Catroux, l'aviador Roland Garros, o periodista Rémy Roure y tamién o futuro mariscal sovietico Mikhail Tukhachevsky. De Gaulle encara tentó de fuyir atras 5 vegatas, sin d'exito. No tornó a Francia dica la suya liberación dimpués d'a sinyatura de l'armisticio de Compiègne l'11 de noviembre de 1918, encara que recibió a Cruz de Caballero d'a Lechión d'Honor y a Croix de guerre 1914-1918 con estrela de bronze.[1]

Periodo d'entreguerras[editar | editar código]

Tropas d'o Exercito polaco en posicions esfensivas mientres a Guerra polaco-sovietica.

En rematar a guerra y estar liberato d'o suyo cautiverio, de Gaulle tornó a la suya carrera melitar. Dende 1919 dica 1921 fue ninviato a Polonia, un país que heba plegato a la suya independencia, fendo parte d'una mesión melitar francesa ta aduyar a creyar o nuevo Exercito polaco mientres que luitaba contra o Exercito Royo d'a Unión Sovietica en a Guerra polaco-sovietica. En ixe inte, pareix que Charles de Gaulle recibió influencias de l'ambient que i trobó, marcato por l'antisemitismo y o pogromismo, como recullen as cartas que ninvió a la suya familia:[2]

Et au milieu de tout cela, d'innombrables […] détestés à mort de toutes les classes de la société, tous enrichis par la guerre dont ils ont profité sur le dos des Russes, des boches et des Polonais, et assez disposés à une révolution sociale où ils recueillaient beaucoup d'argent en échange de quelques mauvais coups.
Y en meyo de tot ixo, os innombrables […] detestatos a muerte por todas as clases socials, totz els enriqueixitos por a guerra d'a cuala han profitato a costa d'os rusos, d'os boches y d'os polacos, y prou dispuestos a una revolución social en a quala culliran muitos diners cuentra recibir bells poquetz trucazos.
Molimento a Charles de Gaulle en a ciudat de Varsovia (Polonia).

En tornar de Polonia, Charles de Gaulle fue destinato a dar cursos d'historia en a Escuela melitar de Saint-Cyr,[3] antis de dentrar en 1922 en a Escuela Superior d'a Guerra. En ixe inte, Charles de Gaulle casó con Yvonne Vendroux o 7 d'abril de 1921, con qui tenió tres fillos: Philippe de Gaulle, naixito en 1921, Élisabeth de Gaulle, naixita en 1924, y Anne de Gaulle, naixita en 1928.

En 1925 fue destinato a o Estato Mayor d'o mariscal Pétain, vicepresident d'o Consello Cheneral d'a Guerra, y en 1927 fue destinato a mandar un batallón de cazataires en Trier, en o territorio de l'Alemanya de Weimar ocupato por os franceses. En 1929 y dica 1931 fue destinato a l'Orient Meyo, a o protectorato francés de Siria, residindo en a ciudat de Beirut (hue a capital d'o Liban) con a suya familia, dica tornar a París destinato a la Secretaría Cheneral d'a Esfensa Nacional.

En ixe inte, Charles de Gaulle publicó as suyas teorías sobre l'arte d'a guerra y d'a scencia melitar, dividitas en quatre libros: La Discorde chez l'ennemi (1924), Le Fil de l'épée (1932), Vers l'armée de métier (1934) y La France et son armée (1938). En istas obras feba reflexions sobre os cambeyos en a guerra provocatos por l'aparición d'armas nuevas (o tanque y l'avión). Asinas, creyeba que encara que yera important disposar en Francia de fortificacions estaticas ta a esfensa d'o suyo territorio, tamién yera important disponer, como deciba Jean-Baptiste Eugène Estienne (considerato o pai de l'arma blindata francesa) d'un cuerpo poderoso de carros de combate ta unir a capacidat de disparo (u potencia de fuego) con a movilidat, caracteristicas propias d'os blindatos, fendo posible asinas a creyación d'una fuerza que podese fer penetracions en a retaguardia enemiga. Tamién consideraba que ta fer ixo posible calía contar no nomás con un Exercito formato por conscripción, sino tamién con un continchent de soldatos profesionals altament cualificatos en estar a suya profesión a profesión de melitar, y no estar nomás a suya presencia en o Exercito limitata a un periodo curto de tiempo. Istas teorías no fuoron bien acullitas, encara que sí cuacoron a la extrema dreita nacionalista d'Action Française (con elochios de presonalidatz como Charles Maurras u Jacques Bainville) y a bells politicos de dreita preocupatos por a renaixencia d'o nacionalismo alemán en l'Alemanya de Weimar que ya esdebeniba o Tercer Reich d'Adolf Hitler, como Paul Reynaud u Philippe Serre.

Tanques Renault FT-17 de fabricación francesa en servicio con o Exercito polaco mientres a Guerra polaco-sovietica, a on ye fácil que de Gaulle veyese o suyo papel melitar en acción.

Difuera de Francia, sindembargo, as teorías de de Gaulle fuoron analizatas por atros melitars con ideyas semilars: Basil Liddell Hart en o Reino Unito y Heinz Guderian en Alemanya, amás de Mikhail Tukhachevsky en a Unión Sovietica, iste zaguero un antigo conoixito d'os suyos tiempos de prisionero de guerra en Alemanya. Isto estió muit important, en confirmar a Guderian en a vía que yera explorando ya d'antis más, encara que Guderian (o creyador d'a fuerza blindata d'a Wehrmacht alemana) adhibiba una qüestión important a la suya teoría d'a blitzkrieg, a participación decisiva de l'aviación melitar con papel prencipal, y no nomás subordinato como pensaba de Gaulle. En Francia, os dirichents melitars d'o país confiaban en as posibilidatz esfensivas d'a Linia Maginot, construita en a muga franco-alemana, y en una guerra de posicions estaticas, y unatro melitar francés que preconizaba ideyas parellanas yera o coronel Émile Mayer, amigo de de Gaulle.

Mapa d'as fortificacions d'a Linia Maginot construitas ta una esfensa estatica d'o territorio francés, en contra d'as ideyas de de Gaulle.

Charles de Gaulle, que yera d'ideyas monarquicas y muit conservadoras y contrario a o sistema parlamentario d'o suyo país, encara que como melitar que yera no lo deciba ubiertament, fació a suya primera conferencia publica en 1934 en a Sorbona de París, vinclato a o grupo Fustel de Coulanges, que a la vegata feba parte d'os cerclos amanatos a l'Action Française. Sindembargo, istas influencias conservadoras yeran mediatizatas y matisatas por atras qüestions: uno d'os suyos mayestros yera o coronel Mayer, d'orichen chodigo; as influencias en de Gaulle d'a obra de Charles Péguy, melitant de cuchas encara que d'ideyas catolicas, y as influencias d'Henri Bergson, tamién d'orichen chodigo. Asinas, de Gaulle tamién teneba relación con grupos cristians partidarios d'o Frent Popular y d'a intervención en a Guerra Civil espanyola chunto a o rechimen republicán contra os sublevatos franquistas, que amás no cal oblidar que yeran aliatos d'a Italia faixista de Mussolini y d'o Tercer Reich d'Adolf Hitler, y que yeran istos os enemigos prencipals de Francia y contra los qualos se preparaba Francia ta esfender-sen en una guerra.

En qualsiquier caso, Léon Blum heba manifestato a suya hostilidat contra as ideyas de Charles de Gaulle en tres articlos publicatos en o diario socialista Le Populaire, en temer que ixe exercito profesional preconizato por de Gaulle se destinase a luitar contra o mesmo pueblo francés, como en o caso d'as vagas. Y, seguntes amanix en una carta ninviata por de Gaulle a Paul Reynaud en 1935, yera ixo mesmo en o que pensaba de Gaulle. Antiparte, as obras de de Gaulle recibiban l'aplauso de l'Action Française.

En 1937, Charles de Gaulle puyó a o ran de coronel, destinato en Metz a mandar un rechimiento blindato, baixo d'as ordens d'o cheneral Charles Delestraint, a on se trobaba destinato en prencipar a Segunda Guerra Mundial.

Segunda Guerra Mundial[editar | editar código]

Ta más detalles, veyer l'articlo Segunda Guerra Mundialveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Tanques Panzer I d'a Wehrmacht dentrando en territorio polaco mientres a invasión de Polonia en 1939 por os alemans.

En prencipiar a Segunda Guerra Mundial, o coronel Charles de Gaulle continaba asinas destinato en Metz, a on vivió a Drôle de guerre, en analizando dende luent a invasión de Polonia en 1939 por a Wehrmacht. Asinas, en chinero de 1940 ninvió a 80 presonalidatz francesas (incluyindo-ie Léon Blum y Paul Reynaud y a os chenerals Maurice Gamelin y Maxime Weygand) un treballo teorico tetulato L'Avènement de la force mécanique sobre as almostranzas d'ixa invasión de Polonia ta a esfensa de Francia, insistindo-ie en a necesidat d'establir una cooperación en o emplego en os campos de batalla d'o tanque y de l'avión.

O 27 de setiembre de 1939, o mesmo día d'a rendición de Varsovia a os alemans, Hitler ordenó a elaboración d'un plan ta una acción melitar en o Frent Occidental, contra Francia, Belchica, Luxemburgo y os Países Baixos, plan que se desembolicó con participación de Henning von Tresckow, Günther Blumentritt, Erich von Manstein y Gerd von Rundstedt y que remató en o dito Plan Manstein, encara que en realidat yera una versión modificata d'o plan preparato por von Manstein.[4] Iste plan esdevenió una acción melitar efectiva o 10 de mayo de 1940, quan prencipió a dita batalla de Francia.

A batalla de Francia[editar | editar código]

Ta más detalles, veyer l'articlo batalla de Franciaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Carro de combate francés modelo B1 albandonato o 14 de mayo de 1940 en o sector de Namur, en Belchica.

Tres días antis de prencipiar l'ataque alemán, se comunicó a o coronel Charles de Gaulle que iba a estar nombrato Comandant en Cabo d'a 4ª División Blindata de Reserva, que alavez yera amás gran unidat blindata d'o Exercito francés, formata por 364 carros de combate. De Gaulle en prenió o mando l'11 de mayo de 1940, y se li ordenó retardar l'abance alemán en a redolada de Laon, premitiendo asinas que o 6º Exercito francés recién creyato prenese posicions ta evitar una penetración alemana enta París. Encara que a división que mandaba yera encara organizata a meyas y en proceso de rematar a suya formación y encara que no heba operato mai como una fuerza melitar conchunta, de Gaulle organizó o 17 de mayo un contrataque en dirección a la localidat de Montcornet, en una d'as pocas vegatas en que tropas francesas facioron reblar a tropas alemanas mientres a batalla de Francia. L'ataque tenió exito, encara que nomás contaba ta fer-lo con alto u baixo 80 tanques d'o total teorico d'a unidat, en no haber-ie plegato encara a totalidat d'a fuerza d'a división. Antiparte, en no recibir garra aduya d'as unidatz mugants, a 4ª División Blindata de Reserva fue obligata a tornar quan plegoron refuerzos alemans. Poco dimpués, quan plegoron mas medios d'a División, tornoron a atacar con arredol de 150 carros de combate, encara que quan plegoron a los suyos obchectivos habioron de tornar, en intervenir mas refuerzos d'aviación (Luftwaffe) y artillería alemans.

O 28 de mayo, a 4ª División Blindata de Reserva, luego d'un viache de 200 km tornó a atacar a los alemans, ista vegata en o sector d'Abbeville, fendo arredol de 400 prisioners a los alemans.

O 6 de chunio de 1940, Paul Reynaud, que en ixe inte yera Primer menistro de Francia, clamó a de Gaulle a la capital, ta que ocupase un cargo de subsecretaire en o suyo Gubierno, concretament o puesto de subsecretaire d'a Guerra y d'a Esfensa Nacional. Charles de Gaulle albandonaba asinas a hierarquía melitar ta dentrar en a politica, estando a suya misión la de coordinar-se con o Reino Unito ta a continación d'a guerra. Asinas, o día 8 de chunio se reunió con Winston Churchill, a qui tentó de convencer ta que os britanicos ninviasen mas tropas (incluyindo-ie avions d'a Royal Air Force) a la luita en Francia, encara que os britanicos, que ya prencipiaban a pensar en a esfensa d'o suyo propio territorio, no lo facioron. O 10 de chunio, de Gaulle albandonó París, declarata por os franceses ciudat ubierta, partecipando poco dimpués en a dita Conferencia de Briare, a on os britanicos miroron de convencer a los franceses de continar con a guerra, postura compartita por Charles de Gaulle, que fue luego ninviato a Londres. Quan tornó d'ixa misión a Bordeus (que heba esdevenito a capital francesa en albandonar-se París a los alemans), o 16 de chunio, tenió conoixencia d'a dimisión de Paul Reynaud, sustituito por o mariscal Philippe Pétain, qui heba demandato un armisticio a los alemans. Antiparte, lochicament, de Gaulle ya no feba parte d'o Gubierno.

A Crida d'o 18 de chunio de 1940[editar | editar código]

Ta más detalles, veyer l'articlo Crida d'o 18 de chunio de 1940veyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Cartel que se pegó en as paretz de Londres, que gosa confundir-se con o texto d'a Crida d'o 18 de chunio.

En veyer a situación, Charles de Gaulle marchó en uno d'os zaguers transportes que albandonaban Francia enta lo Reino Unito, chunto a d'atros franceses a qui no lis cuacaba guaire ni mica a petición de sinyatura d'un armisticio con os alemans, que estió a primera mesura de gubierno de Philippe Pétain, encara que iste armisticio no se sinyó dica o día 22 de chunio (ye o dito armisticio d'o 22 de chunio de 1940). En plegar a las islas britanicas, de Gaulle dició que miraba de dirichir-se por radio a la población francesa, ta fer una crida a la resistencia contra os alemans y a continar a luita.

O Gubierno britanico heba propuesto de fer una crida a la resistencia a Georges Mandel, qui yera menistro de l'Interior de Francia, pero estió de Gaulle qui marchó enta Londres y no Mandel. De Gaulle fació una propuesta de discurso que discutioron os miembros d'o Gabinet britanico, estando Edward Frederick Lindley Wood (Lord Halifax), uno d'os prencipals representants d'a politica de contemporización con o Tercer Reich anterior a la guerra, o prencipal representant d'a oposición a l'emisión d'o discurso por Charles de Gaulle, decindo que calía asperar ta veyer si Pétain sinyaba l'armisticio con os alemans. Estió Winston Churchill (qui ya s'heba oposato a la contemporización con a politica expansionista alemana antis d'a guerra) qui ufrió a suya aduya y en zaguerías, o 18 de chunio de Gaulle se dirichió a los franceses por medio d'a emisora Radio Londres, d'a BBC, en a dita Crida d'o 18 de chunio de 1940, uno d'os suyos mas conoixitos discursos. A suya alocución s'ascuitó en territorio francés a las 19 h, y hue no se conserva garra rechistro sonoro d'ixa emisión (sí se conserva o suyo discurso radiato d'o 22 de chunio, un discurso diferent encara que a sobén se confunde).

A Francia Libre[editar | editar código]

Ta más detalles, veyer l'articlo Francia Libreveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Dende ixe inte, Charles de Gaulle s'adedicó, dende o suyo exilio en Londres, a devantar un estructura politica y melitar dita Francia Libre, no tanto ta continar a luit contra os alemans como adedicata a lograr a supervivencia de Francia chunto a los Aliatos. As suyas perspectivas no yeran pas asinas de creyar unas tropas ta meter-las a disposición d'os Aliatos en a guerra, sino de creyar un estato con os suyos atributos de sobiranía y de lechitimitat, incluyindo-ie o control d'a lo menos parte d'o suyo territorio. Por ixo miraba de encorporar os territorios d'as colonias de Francia, que no yeran ocupatas por as tropas alemanas, esdevenindo asinas istos territorios a plataforma u alazet ta la reconquiesta d'a Francia metropolitana.

Asinas, dende o verano de 1940, con nomás una chicota colla de voluntarios (bell uns d'istos voluntarios yeran aragoneses u d'atros puestos d'Espanya, antigos combatients d'o Exercito Popular Republicán mientres a Guerra Civil espanyola), s'establioron una Armata (Armata d'a Francia Libre, Forces Navales Françaises Libres u FNFL en francés), una Aviación melitar (Fuerzas Aerias d'a Francia Libre, Forces Aériennes Françaises Libres u FAFL) y un Exercito (Fuerzas d'a Francia Libre, Forces Françaises Libres u FFL), amás d'un servicio d'información, espionache y contraespionache, o Bureau Central de Renseignements et d'Action dirichito por André Dewavrin, dito coronel Passy, que prencipió a escape a fer operacions en o territorio metropolitán francés en coordinación con a Resistencia francesa (á on tamién parteciporon quantos aragoneses). Antiparte, l'almirant Émile Muselier, en honor a lo suyo pai, que yera naixito de Lorena, fació a proposa d'adoptar como simbolo d'a Francia Libre a dita Cruz de Lorena. O churista francés René Cassin definió os alazetz politicos d'a Francia Libre y as suyas relacions con o Gubierno britanico y con as atras nacions aliatas. Asinas, a Francia Libre teneba o suyo Banco Nacional, o suyo Diario Oficial u mesmo as suyas condecoracions: en octubre de 1940 o cheneral de Gaulle establió en Brazzaville a dita Ordre de la Libération ta fer honor a los ditos companyers d'a liberación (Compagnons de la Libération en francés). Tamién s'establioron arredol d'o mundo Comités de franceses libres ta vinclar a los franceses que viviban en atros puestos con a Francia Libre y ta fer-los esdevenir grupos de presión en favor d'a causa d'a Francia Libre.

mientres, se condenó en contumacia en Francia a de Gaulle a quatre anyadas de prisión y a la perduga d'a suya nacionalidat francesa; y o 2 d'agosto de 1940 un tribunal melitar francés lo condenó, tamién en contumacia, a pena de muerte, degradaciónmelitar y confiscación d'os suyos biens muebles y inmuebles por traidoría, atentato contra la seguridat exterior d'o estato y deserción a l'estranchero en tiempo de guerra dende un territorio en estato de guerra. En o Reino Unito, de Gaulle teneba l'aduya no nomás de Winston Churchill y d'o Gubierno britanico, sino tamién d'o Parlamento, d'a prensa y d'a opinión publica britanica, que praban cuenta que de Gaulle heba estato chunto a los britanicos en os suyos piors momentos, quan l'amenaza alemana yera mes gran. Iste refirme britanico (y tamién d'a opinión publica estatounitense) esdevenió un important activo d'a Francia Libre quan aparicioron dimpués tensions con os Gubiernos britanico y estatounitense.

Dende o punto d'anvista d'os territorios colonials franceses, a Francia Libre obtenió o refirme de quantos territorios, a sobén en Africa, en adhibir-se-ie o gubernador Félix Éboué o 28 d'agosto de 1940: Chad, Congo y Camerún, estando conquiesto o Gabón en noviembre de 1940. Dende ixos territorios partioron tropas francesas enta o norte, enta Libia, ta partecipar chunto a lo VIII Exercito britanico en a luita contra l'Exercito italián y o Deutsches Afrika Korps d'Erwin Rommel.

En o frent politico, o 24 de setiembre de 1941 de Gaulle establió o Comité Nacional Francés, y en 1941-1942 se bi adhibioron a mayor parte d'as organizacions d'a Resistencia francesa por os contactos feitos por o coronel Passy, Pierre Brossolette y Jean Moulin. Asinas, y como conseqüencia, o 13 de chulio de 1942 o Comité Nacional Francés fació a proposa de cambear oficialment o nombre de Francia Libre enta Francia Combatient, ta dar asinas cabida a las organizacions d'a Resistencia. Cal parar uenta, sindembargo, que quantas organizacions d'a Resistencia con ideyolochía de cuchas no se bi adhibioron, a lo menos alazetalment, en considerar que ideyolochicament o cheneral Charles de Gaulle yera prou amanato a l'Action Française, ni tampoco bellos grupos de resistents d'ideyolochía de dreita, que u bien continaban pensando que o mariscal Philippe Pétain podeba liderar una renovación en Francia y que no yera colaboracionista, u bien que desconfiaban de de Gaulle y prefereban tener os suyos contactos dreitament con os servicios secretos britanicos.

En ixe inte, de Gaulle tentaba de lograr a continidat de Francia, estando un alazet l'alcuerdo sinyato con o Gubierno britanico o 7 d'agosto de 1940, seguntes o qualo o Reino Unito aceptaba mantener a integridat de totz os territorios franceses y asegurar a "restauración integral d'a independencia y d'a grandaria (grandeur) de Francia" en rematar a guerra. O Gubierno britanico financiaba tamién as actividatz d'a Francia Libre, encara que de Gaulle fació que ixo no fuese un gasto, sino un abance financiero a tornar en o futuro, ta no comprometer a independencia d'a Francia Libre. Tamién apareixioron momentos de tensión con os britanicos y dimpués con os estatounitenses quan en aviento de 1941 os Estatos Unitos dentroron en a guerra, tensions que recordaban l'anglofobia manifestata por de Gaulle mientres os anyos 1920 y d'os anyos 1930. Ixas tensions, que existioron con Winston Churchill, o primer menistro britanico, fuoron d'una gravedat mes gran con Franklin Delano Roosevelt, o president estatounitense. Roosevelt, encara que yera francofilo, teneba muita decepción en haber-se esboldregato Francia en chunio de 1940 mientres a batalla de Francia, y tamién por os alcuerdos de colaboración d'a Francia de Vichy con o Tercer Reich. Antiparte, en os Estatos Unitos bi heba un important nuclio de franceses que no yeran partidarios de de Gaulle y que describiron a suya presonalidat a Roosevelt como a presonalidat d'un chicot aprendiz de dictador. Si amás paramos cuenta de l'actitud d'o cheneral de Gaulle d'esfensa intensiva d'os intreses de Francia, y d'os informes de l'ambachador estatounitense en a Francia de Vichy, con simpatías por Pétain, se puet veyer que l'imachen de de Gaulle no yera muit buena en os ambients politicos estatounitenses amanatos a la Presidencia. Tamién l'actitud d'os estatounitenses yera desfavorable a la continidat d'o sistema colonial, y de Gaulle yera un firme esfensor de l'Imperio colonial francés.

En ixas condicions, o Gubierno estatounitenses yera partidario de fer esdevenir a Francia una nación más feble y o suyo plan alazetal ta deixar o territorio francés reconquiesto en mans d'un Allied Military Government of Occupied Territories (AMGOT) quan s reconquiriese en 1944, en ye una conseqüencia.

A reconquiesta d'as colonias francesas y d'a metropoli[editar | editar código]

Africa d'o Norte[editar | editar código]

Ta más detalles, veyer l'articlo Operación Torchveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Quan o 8 de noviembre de 1942, con a dita Operación Torch tropas d'o Exercito estatounitense y d'o Exercito britanico desembarcoron en Africa d'o Norte ta conquerir as colonias de Marruecos, Alcheria y Túniz, debito a las presions estatounitenses as tropas d'a Francia Libre no parteciporon en os desembarcos. Encara que as tropas d'a Francia de Vichy luitoron activament contra las tropas aliatas que i desembarcoron, o Gubierno estatounitense prencipió conversas con l'almirant François Darlan, uno d'os prencipals representants d'o Gubierno de Vichy que en ixe inte se trobaba en Alcher. Quan l'almirant fue asasinato en represalia por a suya politica de colaboracionismo por un choven melitant gaullista, encara preboron os estatounitenses de contactar con o cheneral Henri Giraud, tentando d'estblir un contrapeso a lo cheneral de Gaulle. Sindembargo, de Gaulle plegó a Alcher en mayo de 1943 y desactivó a escape a Giraud creyando de conchunto con iste zaguer o Comité Français de la Libération Nationale (CFLN) prenendo amás o suyo control. En ixas condicions, os estatounitenses rematoron por acceptar a presencia de de Gaulle.

Normandía y Francia[editar | editar código]

Gubierno provisional[editar | editar código]

IV Republica[editar | editar código]

V Republica[editar | editar código]

Vinclos externos[editar | editar código]

Referencias[editar | editar código]

  1. 1,0 1,1 (fr) Charles de Gaulle pendant la grande guerre.
  2. Lettres, notes et carnets, ed. Plon, 1980, tomo 2, p. 28. O sustantivo dezaga de d'innombrables lo retiró o editor d'a obra.
  3. (fr) Cheneral Beaufre: Le drame de 1940, éd. Plon, 1965, p. 31, a on diz En Histoire, le capitaine de Gaulle, jeune, élégant, avec de hautes bottes jaunes, des culottes collantes et une tenue bleu pastel, plein de dignité déjà, nous expliquait en langage noble Richelieu, Mazarin et le traité de Westphalie....
  4. (es) Lozano, Álvaro: Kursk, 1943. La batalla decisiva. Editorial Alabar, Sant Andreu de Llavaneres, 1ª edición, febrero de 2008. ISBN 978-84-96829-60-2, pachina 86.