Cercuito Guadalope

De Biquipedia
Ir a la navegación Ir a la búsqueda
Cercuito Guadalope
Logo Circuito Guadalope.png Vista general con el castillo como protagonista - Alcañiz.JPG
Información cheneral
Localización Alcanyiz, Aragón Flag of Aragon.svg
Eventos prencipals Gran Premio Ciudat d'Alcanyiz
Circuito de Guadalope-Alcañiz.svg
Cercuito urbán
Longaria 3.890 metros
Curvas 14
Tiempo record 1'33"67 (Juan Fernández García, Osella PA9-BMW, 1984)

O Cercuito Guadalope ye un cercuito urbán situato en a localidat d'Alcanyiz (Teruel) que tien una longaria de 3.890 metros. Prene o suyo nombre d'o río que travesa a ciudat d'Alcanyiz, o río Guadalop.

O cercuito ye temporal y urbán. S'han feito competicions ininterrumpidament entre os anyos 1965 y 2003, fueras de 1980, 1981 y 1998 en que se suspendió o Gran Premio Ciudat d'Alcanyiz.

Cursas, records y datos[editar | editar código]

Renault 5 Turbo

Porsche ye a marca que ha ganato en más ocasions sobre o suyo trazato. O suyo nombre fegura en cinco ocasions en o palmarés d'a preba.

O Guadalope ha estato considerato siempre como un cercuito muit estimato por os pilotos d'automobilismo y también por o publico, que empliba a ciudat d'Alcanyiz os cabos de semana que se i feban cursas. Quantas fuents zifran l'afluencia meyana de publico entre os 60.000 y 70.000 asistents en cada Gran Premio.

Mientres d'os anyos 1970 y 1980 se fació muit popular por as prebas d'a "Copa Nacional Renault 8 TS", dimpués conoixita como "Copa Nacional Renault" con a dentrata d'os Renault 5 TS y Renault 5 "Copa".

En iste cercuito han partecipato en cursas pilotos como de Villamil, Carlos Sainz, Chus Puras, Luis Pérez-Sala u Luis Carlos Maurel.

O record d'a pista lo tien Juan Fernández, sobre un Osella PA9-BMW, qui fació una vuelta en 1 menuto 33 segundos 67 centesimas, a una meya de 149,888 km/h.

Ye mui famosa a curva dita "del embudo", situata a la fin d'a recta de meta, por estar una curva estreita con un angulo prou zarrato y por a fuerte frenata que i fan os autos en plegar a dito punto.

Son muit remeratas tamién as curvas ditas "La Monegal", "del puente", "de la barbería" "del apeadero" y "del hospital", asinas como a espectacular "subida del corcho".

En 1992, debant d'o feito de que o cercuito Guadalope yera o más rapedo d'Espanya y que os suyos promedios de vuelta en o Campionato d'Espanya de Torismos yeran más baixos que en instalazions fixas como Xerez u Montmeló, a Federación Espanyola d'Automobilismo obligó a os responsables a instalar dos chicanes en as curvas ditas "del apeadero" y "del hospital".

Trazato d'o cercuito[editar | editar código]

A la fin d'o puent se troba a famosa "curva de la barbería"

Como quasi totz os cercuitos urbans ye un cercuito a-saber-lo polito tanto ta os pilotos como ta os espectadors. O trazato aproveita as dos marguins d'o río Guadalop que travesa en dos ocasions. O sentito de chiro ye antihorario.

A recta más luenga d'o cercuito ye a recta de salita que se troba en l'Avenita d'Aragón, centrica carrera d'a ciudat. Os coches puyan dica o cruce con l'Avenita Galan Bergua, a on que se troba a famosa curva "del embudo", curva prou zarrata a on que se plega con muita velocidat. Continando a traviés d'a mesma avenita se pasa "La Monegal" ta plegar a la chicane "del apeadero" dimpués de travesar o río por primera vegata. Dimpués d'as luengas curvas "del pajarito" y "del portalón" en a marguin dreita d'o río se plega a la curva "del puente". En iste punto os coches tornan a trescruzar o río, ta trobar-se en primeras una atra curva famosa, la "de la barbería". Dimpués d'a impresionant "subida del corcho", paralela a o curso d'o río Guadalop, se plega a la chicane "del hospital" a on que dimpués d'una atra curva se chira ta dentrar atra vegata en a recta de meta.

En total son 3.890 metros con 14 curvas, d'as qualas 8 son a cuchas y 6 a dreitas.

Decayencia y fin d'as cursas[editar | editar código]

Renault 8

En zaguerías d'os anyos 1990 a Federación Espanyola prencipió a meter trabas a la celebración d'o Gran Premio ciudat d'Alcanyiz decindo que no reuniba as condicions de seguridat que yeran menester, encara que o cercuito teneba totz os medios de seguridat que desichiban os reglamentos nacionals y internacionals. En realidat no yeran que maniobras politicas ta chustificar a construcción d'un cercuito fixo baixo a denominación "A Ciudat d'o Motor".

En zaguerías, a Federación Espanyola d'Automobilismo quitó a licencia ta a realización de prebas a ran estatal, quedando nomás as competicions organizatas por a Federación Aragonesa. Os ingresos baixoron muito y en 2004 ya no se podió celebrar o Gran Premio Ciudat d'Alcanyiz.

Milenta d'alcanyizanos y aficionados a o motor de tota Espanya plegatos dica Alcañiz facioron quantas manifestacions con o lema "Alcanyiz quiere as suyas cursas".

Actualidat[editar | editar código]

Dimpués d'a suspensión d'as prebas en o cercuito Guadalope, s'aceleró a construcción d'a dita "Ciudat d'o Motor", baixo grans intreses politicos. En zaguerías, o nuevo prochecto s'inauguro en 2009 baixo o nombre "Motorland Aragón" y con una afluencia de bellas 10.000 presonas. O 24 y 25 d'octubre de 2009 se i fazioron as "World Series by Renault", ta las que s'heban regalato antis totas as dentratas. A tamas de regalar as dentratas nomás bi abió 20.000 asistents, zifra encara muit luent de l'afluencia d'o Cercuito Guadalope.

Refirmes a o Cercuito Guadalope[editar | editar código]

A pasión por o motor se puet sentir en tota a ciudat

A tamas d'a gran presión politica en contra, quantas asociacions d'o mundo d'o motor y pilotos son mirando de tornar a celebrar cursas en o trazato urbán, como ya se fa en a ciudat biarnesa de Pau, a on que a más d'un cercuito fixo (Pau Arnos) tamién se fa anyalment o Gran Premio de Pau en o suyo cercuito urbán

Istas presonas argumentan a mas, que ta o publico no tien garra intrés a celebración de prebas estatals u nacionals si no se fan en o cercuito urbán, que tien un mayor refirme popular.

Aintro d'os grupos que refirman a tornata a l'uso d'iste cercuito bi ha dos sectors: los que refirman a celebración d'o Gran Premio Ciudat d'Alcanyiz en o Cercuito Guadalope, como s'heba feito siempre; y los que opinan que habría d'emplegar-se nomás ta prebas de vehíclos clasicos.

Manimenos, a tamas de que Motorland y o Cercuito Guadalope podesen estar complementarios, os grans intreses economicos y politicos fan muit dificil que actualment torne a recuperar-se iste trazato historico. D'atra man en os medios de comunicación se gosan destacar as virtutz d'o nuevo cercuito, rebuyando l'anterior. En a pachina oficial de Motorland Aragón bi ha poquetas referencias a l'antigo trazato, lo que amostra o notable intrés en borrar qualsiquier alcordanza d'o mesmo.

Vinclos externos[editar | editar código]