Carnaval de Torla

Torla

O carnaval de Torla ye un carnaval tradicional celebrau en a localidat de Torla, en a comarca de Sobrarbe.

Historia

Dimpués de bels anyos d'albandono y prohibición, o carnaval de Torla tornó a celebrar-se por primera vegada en 1989 por iniciativa de bels chóvens d'a localidat que quereban recuperar a fiesta en su formato tradicional.

Celebracions

As celebracions d'o carnaval de Torla.

Os dos personaches protagonistas d'o carnaval de Torla son:

• O Carnaval, en iste caso ye representau por una persona real y no por un muyén como en atros carnavals d'a comarca. En rematar a fiesta habrá de morir pa expiar os pecaus de tot o lugar. O disvraz ye formau por sacos de sarpillera y cubierto con piels de craba. Sobre o tozuelo leva dos grans cuernos de buco y en a esquena dos rudiosos cuartizos.

• O Tenedor, ye l'encargau de prener a o Carnaval y levar-lo debant d'os vecins pa chuzgar-lo. Leva peluca, boina, un palo, una escopeta y un morral pleno de cenisa pa chitar-la a las personas que se troba.

Carnaval ye endrezau con una luenga baguera por Tenedor enta a plaza de Torla. En o camín Carnaval mira d'eslampar mientres Tenedor le fote trucazos con una vara en a esquena. Se fa una ronda por todas as casas d'o lugar a on os vecins ofreixen comida y bebida, dica rematar en a plaza Mayor, cuan ya son fartos de minchar y beber. Astí Carnaval ye chuzgau por un tribunal popular, recitando-se o Romance que diz:

Cuentan que si nació un grandioso animal en as cuevas de a Planiata se ha criato en o Ballazán y s'ha feito grande en Carriata. Ayer ta l'oscurecido campaba por a Plana hoy ha llegato t'as Moracas y ha baixato por as Tobas.

Y en llegán ta Sopeliana ha pillato o camino, y ha baixato cuito, cuito hasta llegar ta la plaza. Aquí lo van a prender y lo van a fer rondar, por todas as calles de o pueblo y as casa de o lugar.

Dimpués de tener-lo bien farto y con güens tragos de mas, lo van a tornar t'a plaza y allí lo van a matar. Una vez d'haber-lo muerto y en o suelo yazca ya, lo baixarán t'arrastro t'astí ta Travecinal.

No se si lo feito bien ni si lo feito, mal está. O que quiera que se ría y o que no puede plorar. Aquí s'acaba o romance d'iste grandioso animal, que no s'en verá mas, hasta el proximo anyo t'allá ta los Carnavals.

En rematar o chudicio o Tenedor dispara a o Carnaval con a suya escopeta, quedando iste muerto en tierra. Posteriorment ye arrocegau enta a parti baixa d'o lugar, l'antigo fosal de Torla dende zaguerías d'o sieglo XVIII en a zona de Travecinal. Contino se fa una cena y baile.

Se veiga tamién

• Carnaval en Aragón

Vinclos externos

• (es) Fotos del Carnaval en Torla. Heraldo de Aragón.