Caracola (cuerno)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un mardano caracoler.

As caracolas son os cuernos caracteristicos d'as especies de mamiferos bovidos ovins, que incluyen cheneros importants como Ovis, a on que se clasifica a las uellas domesticas y a os munflons.

As caracolas se caracterizan por creixer retorcendo-se cara ta'l costau ventral, dende a on que naixen (en o ueso frontal de l'animal), tienden a trazar un cerclo arredol de a orella, con as puntas en apuntando ta fuera.

No toz os eixemplars, en as especies que en tienen, presentan caracolas, tot estando muit frecuent que as uellas domesticas (y dica muitos mardans) no en tiengan. As uellas que tienen caracolas reciben o nombre de «caracoleras», y os mardans «caracolers» u «caracoleros».

Etimolochía

A palabra caracola dimana posiblement, como forma femenina, de «caracol», por a forma retuerta con a que creixen iste tipo de cuernos, que recorda a la closcarana d'ixes gasteropodos.

«Caracol», a dintro d'o dominio lingüistico de l'aragonés, ye una forma conservadera con as consonants oclusivas xordas intervocalicas (lat. <*COCHLEARE) que no s'emplega en tot o territorio. En zonas prou amplas, como a comarca de a Ribagorza u a vecina depresión de a Fueva (Sobrarbe), se gosa preferir a forma sonorizadera «caragol» ta referir-se a os gasteropodos, pero s'emplega igualment caracola ta dicir-le a os cuernos d'istes animals. «Caracol» ye cheneral, por demás, en a resta d'o territorio aragonesofono d'Aragón.

Atros usos

En a villa de Benás, en l'Alta Ribagorza, o lexicografo y naturalista Rafel Vidaller ha documentau l'uso d'o termin caracola, en o ganau ovino, ta referir-se a las uellas melanicas (negras).

Se veiga tamién

• Caracoler
• Mardano
• Corder
• Ovis musimon