Berbers en Al-Andalus

De Biquipedia
Ir a la navegación Ir a la búsqueda

Os berbers estioron presents d'entre periodo andalusí d'a Peninsula Iberica, dende as primeras entratas con Tarik y Muza dica a fin d'o reino Nazarí.

Historia[editar | editar código]

En o periodo román y visigodo, os berbers d'o Rif ya feban expedicions de saqueyo en Baetica. A mas gran parte d'o exercito que entró en Hispania y fació desapareixer o reino visigodo de Toledo yera formato por berbers. O fácil d'a victoria y d'a ocupación melitar animó a berbers de muito más luent que o Rif, y mesmo d'as actuals Libia y Mauritania, a entrar en Al-Andalus.

Os arabes s'establioron en as zonas agricolas ricas (Baixo Guadalquivir, Huerta Valenciana), y deixoron a os berbers zonas de meseta y montanyosas, que se pareixeban a lo suyo habitat de l'Atlas y que yeran más pobres. Qualques berbers defendeban a muga con os cristians d'o norte y deixoron una marca toponimia que encara existe: Albarrazín, Adzaneta, Osella, Favara, Gómara, Mequinenza, Monzalbarba, Titaguas.

Os berbers d'Al-Andalus superaban numericament a os arabes. Seguntes calculos feitos por bell historiador, en os primers decenios d'invasión musulmana os arabes yeran 50.000 y os berbers 150.000 sobre una población de 5 millons d'hispano-romans y visigodos. A proporción de berbers respecto a os arabes creixió con as invasions almorabetz y almuades. En os primers tiempos d'ocupación musulmana os cristians diferenciaban entre berbers, a qui diciban moros (de o latín maurus, Mauritania), y os arabes, a qui diciban sarracins u caldeus.

Os nuclios d'establimiento d'os berbers se distribuiban en 5 grupos: O Sud, O Centro, As marcas u tugur, Levant u Xarc y Balears.

Manimenos con o tiempo o termin moro esdevinió sinonimo de musulmán, aplicato pa muladís, arabes y berbers, y mesmo pa musulmans de más luent. Os arabes asimiloron con o tiempo linguisticament a os berbers porque a luenga relichiosa yera l'arabe y porque os arabes ya teneban una cultura urbana en arabe presa de modelos romans orientals y persans.

Os Berbers en o Sud[editar | editar código]

S'establioron berbers en Algarve (Portugal), Niebla (Uelba), Serranía de Ronda (Malaga), y zonas montanyosas de l'actual Cádiz y Sierra Nevada (Granada).

Os berbers establitos en o Sud yeran d'o grupo Zanata, como os Banu Birzal de Ecicha, Carmona y Almodóvar del Río, Banu Dammar de Morón y Arcos, Banu Irniyan, Banu Ilyas, Banu Zarwal, Banu l-Jali. Bi heba colonias d'a tribu Aureba por tota a provincia de Chaén y familias Azdaya como os Banu Dulaym y os Banu Saquib en Morón. Tamién bi heba Hawwaras como os Banu Yahwar de Marchena.

Os Berbers en o Centro[editar | editar código]

Bi heba berbers en os Pedroches (á lo norte de Cordoba), en Sierra Morena. Yeran posiblement los més lumerosos y los més influenciatos por lo gubierno de Cordoba. Tamién posiblement estioron entre los que s'arabizoron más pronto.

Os Berbers en as Marcas[editar | editar código]

Os berbers d'as Marcas yeran guardians permanents d'as mugas con os cristians y protecheban o interior d'o país ocupato por os musulmans. Guardaban os castiellos y comunicacions d'o sistema defensivo de muga de l'Al-Andalus.

Berbers d'as Marcas u tugur yeran en Cuenca, Guadalachara, Toledo, a zona d'o Guadiana con Merida, y zonas de más a norte dica as cuencas d'o Tajo y Mongego con Talavera, Coria, Medellín, Astorga y Coimbra. Estos zaguers comunicaban con atro nuclio en l'Alto Duero y o Xalón que tamién yeran en contacto con nuclios dispersos en a Marca Superior u Val de l'Ebro, como os berbers de Monzalbarba. En l'este de Cuenca, Teruel y Zaragoza entran en contacto con os berbers d'o nuclio Levantín (Micnasa en Mequinenza y Hawwara en Favara).

Parte d'o territorio d'as actuals provincias de Cuenca, Teruel, Guadalachara y norte de Toledo se dició Cora de Santavariya u Santaver (pronunciación arabe de Celtiberia), y a suya parte norte teneba más caracter de muga que atras coras de l'Al-Andalus. Amás gran parte d'os berbers d'as marcas yeran Hawwara y Madyuna, pero tamién i heba Ausacha (en Osella), Malzuza, Ulhasa, Sadina, Madyuna y Mezmut.

Os Berbers en Levant[editar | editar código]

Os berbers Levantins yeran en comarcas d'as actuals Murcia, Alicant, Valencia, Castellón, Cuenca, y Teruel. Teneban presencia en o río Xiloca meyo y alto y as vals d'o Guadalaviar, Cabriuel, Millars y Alfambra. Yeran especialment d'orichen Hawwara (dixando toponimos tipo Favara), y Madyuna, con presencia de Zenachas y Zenatas en o levant meridional (deixando toponimos como Senija, Adzaneta y Oliva). En Alicant se documenta os Banu l-Jarrubi. En Alpuent yeran presents os Banu Dasim d'o grupo Kutama. En Teruel y Villel yeran emirs os Banu Amira y os Banu Gazlun, que perteneixeban a la tribu Ulhasa, branca d'os Nafzawa.

Os Berbers en as Balears[editar | editar código]

En as Balears se crei que i habió clans y familias Gomara, Matgara, Hawwara, Masmuda, Zanata, Sadina, Malila, Nafzawa, Taskura y Masufa. Os Banu Ganiya, que yeran representants d'os Almorabetz, en o gobierno d'as islas yeran masufas.