Batedera (electrodomestico)
Una batedera[1] ye un electrodomestico emplegau pa fluidificar u moler os alimentos y aconseguir una pasta de mayor u menor liquidez seguntes os ingredients que se faigan servir. Se puet emplegar pa fer diferents tipos de purés, salsas y sopas.
En a suya versión de vaso ye compuesta por un suporte tecnolochico, una cutiella d'alto filo que ye a encargada de chirar y picar os alimentos, un vaso pa contener os alimentos y a tapa. As batederas de man constan prencipalment d'un motor electrico situau dreitament en o mango y un eixe que conecta iste motor a las cutiellas situadas en a parti inferior. En os dos casos o motor empenta as cutiellas, que chiran a alta velocidat pa picar y mezclar os ingredients. Muitas batederas modernas incluyen accesorios adicionals, como varetas batederas, capoladeras u procesadors d'alimentos, lo que enampla a suya versatilidat en a cocina.
As batederas pueden servir pa tot, pero se recomienda o suyo uso por parti d'un adulto u persona experimentada, ya que ye un utensilio prou perigloso.
Historia
[editar | modificar o codigo]L'inventor d'a batedera de vaso estió Stephen J. Poplawski,[2] un polaco radicado en o estau nortamericano de Wisconsin, que ya en a suya nineza amostró una obsesión por inventar dispositivos destinaus a la mezcla de bebidas.
En 1922, dimpués de cinco anyos de experimentación, Poplawski patentó a primera batedera, y anotó que yera o primer aparato mezclador que teneba un elemento rechirador montau en o fundo d'una taza, y que mezclaba bebidas maltiadas cuan a taza se situaba en una cavidat en a base de l'aparato.
Poplawski, en 1953, mientres un pleito de patents, dició que en 1922 no pensaba en a licuadora pa a maceración de fruitas y verduras, pero sí como triturador d'alimentos.
En os suyos orichens se emplegaban mas que mas en hespitals a on s'amenistaba d'un meyo pa triturar y mezclar diferents medicamentos y alimento. Posteriorment con a masiva difusión de pastiellas concentradas l'uso medico se redució y se difundió masivament en os fogars.
A batedera de man apareixió mas tardi, estando inventada en 1950 por Roger Perrinjaquet, un incheniero suizo. En primeras, iste dispositivo fue disenyau pa uso profesional en cocinas y restaurants. Manimenos, a suya popularidat s'estendilló ascape a l'ambito domestico, a on se convertió en una ferramienta esencial pa a preparación d'una variedat d'alimentos. En a suya primera patent, Perrinjaquet la clamó Bamix, una contracción de bat et mixe (bate y mezcla).[3] O 24 d'abril de 1955 se presentó por primera vegada a nueva batedera Bamix en a Feria de Hannover. Pero a versión mas popular fue la inventada por l'incheniero Gabriel Lluelles (Barcelona, 1923) pa la empresa espanyola Pimer (acronimo de Pequeñas Industrias Mecánico Eléctricas Reunidas[4]), y que fue clamada Minipimer,[5] comercializada en 1959. A empresa fue posteriorment comprada por l'alemana Braun GmbH, que mantenió o nombre orichinal de l'artefacto, que s'ha convertiu en o nombre común d'ista mena de batederas.[6]
Se veiga tamién
[editar | modificar o codigo]Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ (en) Stephen J. Poplawski
- ↑ (es) Batidoras de mano www.chefrecomienda.com
- ↑ (es) Phylosoft.com
- ↑ www2.braunhousehold.com
- ↑ (es) Larga vida a la minipimer. Artículo en el País, 21 de enero de 2008
