Arangután (mitolochía)

De Biquipedia
Ir a la navegación Ir a la búsqueda
Este articlo tracta sobre a creyatura mitica d'os Perineus. Pa lo primate hominido, se veiga Pongo.
Sasquatch u o Big Foot d'America d'o Norte, un ser muit aparent a la desripción que s'ha feto d'os orangutans.

Os arangutans[1], ongarutans, gotagutans[2] u cabe suposar que tamién orangutans, son unas creyaturas antropomorfas de mito que s'ha documentau nombradas bellas veces en o sieglo XX en o Perineu central aragonés, como habitants presumptos d'as alturas y as cimas.

D'alcuerdo con as descripcions, os arangutans serían sers bipedos d'apariencia antopomorfa, pero con o cuerpo cubierto de pelo como animals. Tamién estarían prou más grans que un humano, y d'alcuerdo con bell testimonio, eventualment podrían furtar bistiar en as estivas pa alimentar-se.[2] S'ha descrito que podrían desencadenar chiros de l'orache chusto antes d'atacar, como que se meta boira preta u que esclate bella tronada entre medio de la qual aprofitarían pa apoderar-se de bell animal.[2]

Presumptos avistamientos[editar | editar código]

Os arangutans amaneixen más que más en a tradición d'as valles de Sobrarbe, anque tamién s'ha contau historias d'avistamientos de sers semellants en a val de Benás, en Sarrablo, en Luesia u en Riglos.[2]

En Escuaín, que ye lo lugar más remoto de la valle de Tella, s'ha descrito más d'un alcuentro con un d'estes animals. Una d'estas historias les ne podemos leyer a Ramón Lasaosa y a Miguel Ortega que explican que una anciana d'este lugar que perteneix a lo concello de Puértolas les explicó como, estando pastora de choven, una vez yera con un atro pastor en a pleta de Sant Vicienda (en Sensa) de noches y yera lo cielo laso. De golpe, se sintión rudios y voces que escacilaban y a l'instante les cayó una tronada con pedrisco que deixoron de vier cosa. As uellas se desmandón por tota la montanya, y alavetz lo vidon a la luz de la luna. L'arangután diz fue matando uellas por a montanya de Sobrarbe un tiempo, dica que le dioron muerte en l'Aínsa, chusto dimpués de que matase d'espanto a dos misachas de la villa.[2]

L'arangután de las Paniellas[editar | editar código]

Sasquatch.svg

L'arangután de las Paniellas ye una historia popular de Chistén que parla sobre dos ninas que iban pastoras con las crabas de casa suya ta una partida que en dicen Las Paniellas. Las zagalas yeran enchugardidas y se deixaban de cosirar a lo ganau de camín, asinas que es animals se les meteban en o fener a un vecín suyo. L'avuelo d'este atro prau teneba que atruar-les-ne y, farto de que se le redisen quan las carranyaba, furdió un plan.

Asinas que un día que las chiquetas yeran en o prau fendo fatezas, va y les amaneix un bicho cerrudo con cuernos y rabo, y les brama:

Soi l'arangután de las Paniellas! A qui pillo me'l como!

A las quatre suelas baixón las zagaletas enta lugar, y quan plegan ta casa, su mai les preguntó que qué les pasaba, a lo que ellas le'n explican. Luego se sabió que ixe ser no yera si que l'avuelo de l'atra casa, que s'heba disfrazau. Nunca más se deixoron escapar las crabas ta'l prau de garra vecino.[3]

Etimolochía[editar | editar código]

D'una traza prou evident, a parola «arangután» y totas as suyas variants dimanan de o nombre d'ixe gran simio tropical a través d'o castellano <orangután.[2] La parola ye d'orichen malayo y no puede haber estau amprada directament por l'aragonés: <ōrǎng, "hombre", y <ūtǎn, "selva"; «Hombre d'a selva».[4]

A razón por a qual reciben ixe nombre y no lo d'un atro simio que agora nos pueda pareixer más conoixiu, como chimpanzés y gorilas, ye que pareix que os orangutans fuen os primers grans simios que se vido en as ferias en Europa. Ya a principios d'o sieglo XIX ye documentau que la emperatriz Josephine, esposa de Napolión, en teneba un de mascota.[2] Tampoco s'ha de descartar que s'exhibise bel animal d'estes en as ferias francesas d'ixa epoca, a las quals os ganaders y artesans d'a montanya aragonesa trescruzaban asobén.

Curiosament, a parola orangután apareixió por primer vez en o Diccionario de la Real Academia en a edición de 1843, mientres que gorila y chimpancé no i saldrían dica 1884.[2]

Tamién podría haber influiu en o nombre d'esta creyatura la existencia d'una marca d'anís prou popular a principios d'o sieglo XX, que se deciba Anís del Orangután,[2] que se feba en Haro (a Riocha) y yera competidera de l'Anís del Mono de Badalona que encara existe.

Referencias[editar | editar código]

  1. (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0
  2. 2,0 2,1 2,2 2,3 2,4 2,5 2,6 2,7 2,8 (es) LASAOSA SUSÍN, Ramón y ORTEGA MARTÍNEZ, Miguel, Miradas desde Tella; Ediciones Imago. Zaragoza, 2003. ISBN 978-84-88518-61-7
  3. (an) L'arangután de las Paniellas, consultau o 9 d'aviento de 2019.
  4. (es) Etimología de Orangután; consultada o 8 d'aviento de 2019.

Se veiga tamién[editar | editar código]