Apellito Chasco

From Wikipedia
Jump to navigation Jump to search

L'apelliu Chasco u Txasko ye un apelliu vasco que tiene as suyas radices tradicionals en Los Arcos (Reino de Navarra), encara que tiene ramas en a propia Navarra (Viana) y en Alava (Santa Cruz de Campezo).

Historia y heraldica[edit | edit source]

Se tracta un linache d'orichen vasco-navarro que a suya mas antiga casa solar radicó en a villa de Los Arcos,[1] d'o partiu chudicial d'Estella, en Navarra, d'an pasó a las poblacions cercanas de Nazar, Piedramillera, Torralba del Río, Estuniga y Espronceda. Prebó lo suyo hidalguía en repetidas ocasions, en Los Arcos se devanta encara la suya casa-palacio d'o S. XIV con torre y cabo d'armería, esto ye, piedra angular con as armas d'a familia en baixorrelieu, frent a la plaza mayor y la Seu.[2] En esta mesma ciudat yera emparentada con atros linaches nobles d'allí, como lo d'Alba, descendent d'o ilustre linache d'Alava,[3] que lo suyo escudo usaba, y asinas trobamos que José d'Alba y Chasco, con atros chirmans y deudos, litigoron y obtenioron sentencia favorable de l'Audiencia de Navarra respective a l'uso d'o referiu escudo. Amás, asistió siempre Juan Chasco, en Los Arcos, a las chuntas que lo estau noble celebraba en o claustro d'a ilesia parroquial y estió Rechidor perpetuo d'a villa, como compreban abundants testimonios d'escribanos.[2]

Escudos de l'apelliu Chasco.

L'apelliu data de 1307,[4] pero dica l'anyo 1798 no s'incorpororon os expedients d'hidalguía, y en ell consta o escudo d'armas que amaneixeba en a casa de Los Arcos. A suya heraldica consta d'un pino, y un lión andante, trascruzau a lo piet d'o tronco, rancau; a cada costau de l'arbol, un castiello.[5] Existe unatro escudo seguntes Vicente de Cadenas y Vicent: azul, una clau de plata, mesa en palo y acompanyada, en a diestra, por un candau d'oro.[6]

Etimolochía[edit | edit source]

Seguntes Euskaltzaindia a suya grafía actual para os vascofonos habría d'adoptar a tx y a k de l'euskera actual, substituindo Chasco por Txasko.[7]

Grafía tradicional Grafía academica actual
Chasco Txasko

L'orichen y etimolochía d'o linache "(De) Chasco" u "Txasko" no ha estau obchecto d'estudio por parte de muitos historiadors por o que existen pocos libros que charren d'o apelliu como que tal. Entre os estudiosos d'iste apelliu trobamos a l'erudito Don Alfredo Basan. Contino s'exposan qualques d'as obras que analisan l'apelliu en o dito aspecto:

  • Euskal deituren izendegia (Philippe Oyhamburu):

Chasco: Etxazko (D'o termin "casa", en euskera "etxe") u Sasko (D'o termin "chinestra", en euskera "sasi").

  • Apellidos bascos (Endika de Mogrobejo):

Txasko: Retamal (terreno poblau de chinestras, plantas arbustivas de flors amariellas).

Como que conclusión, destacamos a coincidencia d'os dos autors en que a etimolochía d'o apellido deriva de "sasi" (barza, chinestra). Tot ixo, sin perchuicio de que encara que totz dos autors haigan intentau trobar radices euskericas, a partir de "etxe" (casa) u "sasi" (barza, barzal), res verosimil se puede decir a o respecto.

En tot caso, y parando cuenta a la localización cheografica que historicament ha teniu l'apelliu, ye probable que a suya formación pueda estar relacionada con o romance navarro u navarro, charrau entre os sieglos X dica o XVII en o centro y sud de Navarra, que pese a o proceso de castellanización sufierto, tanto o lexico como que as fablas castellanas d'o centro, sud y este de Navarra han manteniu dica calendata recient u conservan hue en día rasgos identificativos d'iste como que l'aversión a las parolas esdruixulas. Entre as caracteristicas d'o citau idioma destacamos, por a suya posible relación con l'apelliu que estudiamos, as particularidatz foneticas que presienta, como que puede estar a tendencia a perder a y- inicial. Eixemplo d'ixo será la formación d'o navarrismo mas extendiu como que ye o antropónimo Xabier, adaptau a muitas luengas occidentals.

  • Etxe (u etxa- en componius) berri ("Casa nueva" en basco) > Exavierre (1091) > Xavier, (y atras variants dende 1102)

Seguindo ista teoría podemos plegar a la siguient conclusión:

  • Etxe (u etxa-) asko ("Aglomeración de casas u muitas casas" en vasco) u unatra posible composición a partir de l'afixo -zko (Sufixo de materia, que indica a composición u substancia d'un obchecto u ser[8] vasco) > Echasco u Etxazko > Chasco.

Preba d'ixo será la cita que exposamos contino fechada en l'anyo 1358 d.C. en a villa de Piedramillera d'a Merindat d'Estella:

Sancha Legarda, la quoal caso con Lope Echasco el jouen, de los quales ha biua una fija que´l diçen Maria, et hereda los bienes de su madre et biue en casa de Lope Chasco el maor, que es biuo.[9]
Repartición de l'apelliu Txasko u Chasco en a Peninsula Iberica.

Referencias[edit | edit source]

  1. Google maps Casa en Los Arcos, Navarra, en a carrera mayor 31, con o escudo de Chasco.
  2. 2,0 2,1 (es) Chasco, consultada o 15 d'aviento de 2019.
  3. (es) Merindad de Estella, consultada o 15 d'aviento de 2019.
  4. (es) Antzinako - Antzninako, consultada o 15 d'aviento de 2019.
  5. (es) BASANTA DE LA RIVA, Alfredo (1930). Imprenta castellana, ed. Nobleza alavesa nobiliario compuesto con documentos inéditos de la Real Cancillería de Valladolid, p. 165. Consultau o 27 d'octubre de 2019.
  6. (es) Heráldica de Viana, consultada o 15 d'aviento de 2019.
  7. (eu) Euskal deiturak - deiturak (Euskalzaindia). p. 46. Consultau o 15 d'aviento de 2019.
  8. (es) CAMPIÓN, Arturo (1884). Gramática de los cuatro Dialectos Literarios de la Lengua Euskera. p. 233.
  9. (es) JIMENO JURÍO, José María (1970). El Libro Rubro de Iranzu. Príncipe de Viana. ISSN 0032-8472, Año nº 31, Nº 120-121, 1970, págs. 221-270.

Enlaces externos[edit | edit source]