Anestesia epidural
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
L'anestesia epidural u anestesia peridural ye a introducción d'anestesico local en o espacio epidural, bloqueyando asinas as terminacions niervosas en a suya salida d'o miollo espinal. Por lo tanto, a suya distribución será metamerica, ye decir, s'anestesiará a zona d'o cuerpo que corresponde a os niérvols que han estau alcanzaus por l'anestesico local inchectau.
Se considera lenguache coloquial abreviar a exprisión como epidural (por eixemplo "meter a epidural").[1]
Historia[editar | modificar o codigo]
O neurologo estausunidense James Leonard Corning (1855-1923) estió o primero en reyalizar un bloqueyo neuraxial en 1885 quando inchectó 111 mg de cocaína en o espacio epidural d'un voluntario.[2][3] En 1921 o ciruchano militar aragonés Fidel Pagés (1886–1923) la desarrolló convertindo-se asinas en o inventor d'ista tecnica, d'alcuerdo a la sociedat scientifica internacional. Amás desarrolló l'anestesia lumbar epidural d'inchección unica que dimpués popularizó o ciruchano italiano Achille Mario Dogliotti (1897–1966). O primer uso d'una anestesia de cabal contino mientres un parto estió en 1942 y fue desarrollau por Robert Andrew Hingson (1913-1996) y Waldo B. Edwards. En 1947, o cubano Manuel Martínez Curbelo (1906–1962) describió a colocación d'un catéter lumbar epidural.
Indicacions[editar | modificar o codigo]
O suyo uso más común ye pa bloqueyar a dolor mientres o parto, encara que tamién se fa servir en intervencions quirurchicas como operacions d'as garras, pelvis u chenitals.
En o parto[editar | modificar o codigo]
L'analchesia epidural permite l'alivio d'a sensación de dolor mientres o parto y rebaixa o livel d'ansiedat d'a mai. Tamién posibilita tecnicas instrumentals (fórceps u ventosa) sin que siga menester aplicar atra mena d'anestesia.
Contraindicacions[editar | modificar o codigo]
L'anestesia epidural ye contraindicada en os casos de parto en os que a dilatación ye masiau abanzada, en os casos de tatuaches en a zona lumbar en función d'a suya localización y en pacients que sufren qualques malautías como obesidat u cardiopatías.
Tecnica[editar | modificar o codigo]
A tecnica de punción epidural se reyaliza con o pacient posau u en posición de decubito lateral y se punciona o espacio entre as dos apofisis espinosas d'a vertebra. O livel de punción ye en función d'a zona que se deseya anestesiar. A punción lumbar, que ye a más frecuent, se reyaliza en os espacios vertebrals entre dos vertebras lumbars y s'anestesia a zona abdominal.
L'anestesia peridural se reyaliza a traviés de quantas tecnicas. Todas ellas consisten en a busqueda d'o espacio epidural. Iste ye un espacio virtual que se troba por difuera d'a duramadre. Por meyo d'anestesia d'a piel en o puesto de punción, se i fica una agulla conectada a una xeringa con poca resistencia plena d'aire u augua. Se va ficando l'agulla y se va pretando l'embolo d'a xeringa. Mientres se travesa musclo u ligamentos se produce una resistencia en pretar l'embolo. En plegar ta o espacio epidural ista resistencia desapareixe y permite eslimbiar l'aire u l'augua. Isto ye o signo de que s'ha arribau ta o espacio epidural. En iste puesto se mete o farmaco que se va a administrar y o catéter si cal.
L'anestesia epidural ye indicada pa reyalizar aquellas intervencions en abdomen, más que más a livel infraumbilical, como son esvinzaduras, intervencions en testiclos, vuixiga u partos. L'apendicitis que corresponde a ista zona no ye una buena indicación ya que, encara que a piel si corresponde a la zona, l'apendiz y o bodiello adchacent son innervaus por niérvols de livels superiors a la zona anestesiada y, en traccionar o bodiello, puet producir-se dolor.
Una modificación d'ista tecnica pende en ficar un catéter en o espacio epidural por o que se pueden reinchectar farmacos, u bien instaurar una perfusión pa producir una anestesia contina y prolongada, útil pa intervencions luengas u pa analgesia postoperatoria. Os farmacos que s'inchectan en o espacio epidural son quantos, pero más que más son os anestesicos locals. Istos producen un efecto en función d'a dosi administrada. En chicotas dosis bloqueyan as fibras que transmiten a dolor. A más altas dosis producen bloqueyo de l'actividad muscular y una paralisis. Y a mayors dosis encara un bloqueyo sensitivo. Atros farmacos emplegaus son diferents derivaus morfinicos. En l'actualidad s'han publicau quantos treballos sobre a inchección de diferents farmacos por vía peridural como a clonidina u a ketamina, farmacos d'utilización endovenosa pero que s'ha visto que tamién actúan a livel d'a fibra niervosa. L'asociación por vía epidural de dos farmacos potencia l'acción d'os dos minimizando os suyos efectos segundarios en permitir reducir a dosi.
En os zaguers anyos se ye emplegando muito l'anestesia peridural toracica que consiste en a mesma tecnica pero a livel d'as vertebras toracicas. D'ista manera se produce l'analchesia de zonas superiors a las alcanzadas con a peridural lumbar y s'emplega más que más pa analchesia postoperatoria de ciruchía abdominal alta u ciruchía toracica.
Se veiga también[editar | modificar o codigo]
- Anestesia
- Intradural u raquidia
- Anestesico
- Anestesico local
- Analchesico
- Morfina
- Escalera analchesica d'a OMS
- Terapia intravenosa
Referencias[editar | modificar o codigo]
- ↑ (es) Real Academia Nacional de Medicina. Diccionario de términos médicos. Madrid: Panamericana; 2012.
- ↑ (es) "Spinal anaesthesia and local medication of the cord". J.L. Corning. New York Medical Journal. Volumen 42. 1885. Pachinas 483–5.
- ↑ (es) "The first spinal anesthesia. Who deserves the laurels?". G.F. Marx. Regional Anesthesia. Volumen 19, numero 6, 1994. Pachinas 429–30. PMID 7848956
Vinclos externos[editar | modificar o codigo]
Se veigan as imachens de Commons sobre l'anestesia epidural.- (en) Anestesia epidural MedlinePlus, NIH.
