Andrés Santos de Sampedro

Andrés Santos de Sampedro
Arcebispe de Zaragoza y bispe de Teruel

18^eno Arcebispe de Zaragoza
27 d'abril de 1578 - 13 de noviembre de 1585
Predecesor	Bernardo Alvarado de Fresneda
Succesor	Andrés de Bobadilla
1^er Bispe de Teruel
4 de chulio de 1577 - 1578
Predecesor	Juan Pérez de Artieda
Succesor	Jaime Jimeno de Lobera

Naixencia	1529 Quintanadíez de la Vega (Reino de Leyón)
Muerte	13 de noviembre de 1585 Monzón (Aragón)

Andrés Santos de Sampedro u Andrés Santos Quintana (Quintanadíez de la Vega, Leyón, 1529 - Zaragoza, 13 de noviembre de 1585) estió bispe de Teruel y posteriorment arcebispe de Zaragoza.

Biografía

Naixió de Quintanadíez de la Vega, pedanía perteneixient a o municipio de Villaluenga de la Vega, actual provincia de Palencia en l'anyo 1529. Estudió en a Universidat de Valladolit, institución de prestichio en o Reino de Castiella por ixas envueltas, y treballó dimpués como fiscal de lo criminal en a Reyal Cancellería, entre 1559 y 1565, y en o Tribunal d'a Inquisición, dende 1560, d'ixa mesma ciudat. Como inquisidor reyalizó as suyas fainas tamién en Córdoba, con estadas en Valencia y Mallorca.

O 14 d'agosto de 1575 se trelada a o Tribunal d'o Santo Oficio d'a ciudat de Zaragoza, situada ta par d'alavez en o Palacio de l'Alchafaría. Andrés Santos exerció mientres bels anyos como o Inquisidor Cheneral d'o Reino d'Aragón, lo que suposó un empentón important en a suya carrera profesional.

Seis meses dimpués d'a muerte de l'arcebispe de Zaragoza, don Ferrando d'Aragón, o 30 de chulio de 1577, s'eriche a nueva diocesi teruelana. O motivo d'a desmembración d'iste territorio yera o gran poder y extensión que teneba l'archidiocesi zaragozana, feito que preocupaba a o rei Felipe I y a o papa Gregorio XIII, qui promulgó a bula que executaba a deseparación. En iste inte s'eslichió como primer bispe a o canonche Chuan Pérez d'Artieda a qui o monarca nombró dimpués bispe de Chaca, pero morió sin prener posesión de denguna diocesi. Asinas o rei decidió nombrar finalment como bispe pa la nueva seu a Andrés Santos.

Tanimientres, Bernardo Alvarado de Fresneda fue nombrau arcebispe metropolitano en 1577, estando nomás un anyo en o cargo. O 27 d'abril de 1578 Andrés Santos puyaría a la cadiera arcebispal de Zaragoza, una d'as seus con mas rentas eclesiasticas y propiedaz en ixos anyos.

Como arcebispe de Zaragoza asistió en 1582 y 1585 a las visitas d'a familia reyal a la ciudat, remodelando cuantas cambras d'o suyo palacio pa istas ocasions. Estió present en as Corz de Monzón de 1585, pocos meses antis de morir.

Vinclos externos

(es) La figura y patrocinio artístico del Inquisidor y Arzobispo de Zaragoza Andrés Santos (1529-1585): vínculos y conexiones culturales en los territorios peninsulares en el siglo XVI. Mar Aznar Recuenco. Tesis d'a Universidat de Zaragoza. 2016 ISBN 978-84-617-5066-5.
(es) Andrés Santos Quintana (de Sampedro) en www.catholic-hierarchy.org


Cargos eclesiasticos
Predecesor: Bernardo Alvarado de Fresneda	Arcebispe de Zaragoza 27 d'abril de 1578 - 13 de noviembre de 1585	Succesor: Andrés de Bobadilla
Predecesor: Juan Pérez de Artieda	Bispe de Teruel 4 de chulio de 1577 - 1578	Succesor: Jaime Jimeno de Lobera

Datos: Q64775447